پاک بحریہ کے شہید اہلکاروں کی نمازِ جنازہ ادا کردی گئی -
The news is by your side.

Advertisement

پاک بحریہ کے شہید اہلکاروں کی نمازِ جنازہ ادا کردی گئی

کراچی : پاک بحریہ کے شہید اہلکاروں کی نمازِ جنازہ ادا کردی گئی۔

تفصیلات کے مطابق گذشتہ روز جیونی میں دہشت گردی کی ایک بزدلانہ کاروائی کے نتیجے میں جام ِ شہادت نوش کرنے والے پا ک بحریہ کے دو اہلکاروں سید حسن رضا( میڈیکل ٹیکنیشن) اور خلیل مراد (لیڈنگ فائر مین) کی نماز جنازہ آج پاک بحریہ کے اسپتال پی این ایس شفاء میں اد ا کردی گئی۔

چیف آف نیول اسٹاف ایڈمرل محمد ذکاء اللہ نے بھی نماز جنازہ میں شرکت کی۔

چیف آف نیول اسٹاف نے پاک بحریہ کے اہلکاروں پر شر پسندوں کے اس حملے کی شدید مذمت کی اور غمزدہ خاندانوں سے تعزیت کی۔ نیول چیف نے اس واقعے پر گہرے دکھ اور افسوس کا اظہار کرتے ہوئے کہا کہ اس طرح کی بزدلانہ کارروائیاں دہشت گردی کے خلاف پاک بحریہ کے عزم کو متزلزل نہیں کر سکتیں۔

ایڈمرل ذکاء اللہ نے مزید کہا کہ وطن عزیز سے دہشت گردی کے خاتمے اور ملکی دفاع کے لیے شہداء کی یہ عظیم قربانیاں گرانقدر اور لائق ِ تحسین ہیں۔

انہوں نے کہا کہ مٹھی بھر دہشت گر وطن عزیز کوعدم استحکام سے دوچار کرنے کے مذموم مقاصد میں کامیاب نہیں ہوسکتے۔ انہوں نے اس امر کا اعادہ کیا کہ پاک بحریہ دیگر قانون نافذ کرنے والے اداروں کے شانہ بشانہ ملک سے دہشت گردی کے ناسور کو جڑ سے اکھاڑ پھینکنے کے لیے پر عزم ہے۔

نیول چیف نے اس موقع پر دعا کی کہ اللہ تعالیٰ شہید اہلکاروں کو اپنے جوارِ رحمت میں اعلیٰ مقام عطا فرمائے اور ان کے اہلِ خانہ کو یہ صدمہ برداشت کرنے کی ہمت اور توفیق عطا کرے۔

انہوں نے پی این ایس شفاء میں زیر علاج زخمی اہلکاروں کی عیادت کی جلد صحت یابی کے لیے بھی دعا کی اور شہداء اور زخمیوں کے اہل خانہ سے ملاقات بھی کی۔


مزید پڑھیں : بلوچستان: شرپسندوں کا نیوی کی گاڑی پرحملہ، 2اہلکار شہید 3 زخمی


یاد رہے کہ گزشتہ روز بلوچستان کے ساحلی شہرجیونی میں نامعلوم شرپسندوں نے پاک بحریہ کی گاڑی پراندھا دھند فائرنگ کردی جس کے نتیجے میں گاڑی میں موجود دو اہلکاروں نے موقع پر جان دے دی تھی۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

Comments

comments

یہ بھی پڑھیں