کراچی: سعودی ایوی ایشن گا کا نے ایئر لائنز کو غیر سعودی مسافروں کو ملک سے باہر لے جانے کی اجازت دے دی۔
تفصیلات کے مطابق گاکا نے نیا سفری ہدایت نامہ جاری کر دیا ہے جس کے تحت اب ایئر لائنز غیر سعودی مسافروں کو ملک سے باہر لے جا سکیں گی۔
تاہم اس ہدایت نامے میں کہا گیا ہے کہ کرونا کی دوسری لہر سے متاثرہ ممالک کی ایئر لائنز کے لیے یہ اجازت نامہ کارآمد نہیں ہے۔
جنرل اتھارٹی آف سول ایوی ایشن نے اس سلسلے میں ایئر لائنز کو ایک مراسلہ ارسال کیا ہے، جس میں کہا گیا ہے کہ ایئر لائنز اپنے فضائی آپریشن میں کو وِڈ 19 کے لیے جاری ایس او پیز پر عمل درآمد کرنے کی پابند ہوں گی۔
سعودی عرب کا فضائی آپریشن پر پابندی کا اعلان، پی آئی اے کی پروازیں بھی منسوخ
مراسلے کے مطابق ایئر لائنز کے عملے کو طیارے سے اترنے اور گراؤنڈ اسٹاف سے فزیکل رابطے کی اجازت نہیں ہوگی، جب کہ پروازیں آپریٹ کرنے سے قبل متعلقہ ایئر لائنز ایس او پیز کے بارے میں ایئر ٹرانسپورٹ ڈیپارٹمنٹ سے رابطے کی پابند ہوں گی۔
یاد رہے کہ سعودی عرب نے 21 دسمبر کو ایک ہفتے کے لیے پروازوں کی معطلی کا اعلان کیا تھا۔
برطانیہ میں مہلک وبا کرونا وائرس کی نئی قسم کے سامنے آنے کے بعد کرونا مریضوں کی تعداد میں ایک دم اضافہ ہوگیا ہے جس سے اپنے شہریوں اور مقیم غیر ملکیوں کو بچانے کے لیے سعودی حکام نے بین الااقوامی فضائی آپریشن پر پابندی عائد کی تھی۔
