ٹیکسلا پولیس نے اے ٹی ایم اسکیمنگ کے ذریعے شہریوں کو لوٹنے والے تین رکنی گروہ کو گرفتار کرکے سامان برآمد کرلیا۔
اے آر وائی نیوز کے مطابق اے ٹی ایم اسکیمنگ سے شہریوں کو لوٹنے والے گروہ کو پکڑلیا گیا ہے۔
ٹیکسلا پولیس نے بڑی کارروائی کرتے ہوئے اے ٹی ایم مشینوں کے ذریعے شہریوں کے اکاؤنٹس سے رقوم نکلوانے والے تین سائبر ایکسپرٹ ملزمان کو گرفتار کر لیا۔
گرفتار ملزمان کی شناخت عمران، خالد اور فرحان کے ناموں سے ہوئی ہے۔
پولیس کے مطابق گرفتار ملزمان کے قبضے سے اےٹی ایم ٹریکنگ ڈیوائسز، بیٹریاں،اےٹی ایم کارڈ، 42ہزار روپے نقدی،3 موبائل فون اور کار برآمد کی گئی ہے۔
پولیس نے بتایا کہ گرفتار ملزمان انفارمیشن ٹیکنالوجی کے استعمال میں مہارت رکھتے ہیں اور اس سے قبل بھی ملزمان سائبر کرائم کے جرائم میں ملوث رہے ہیں۔
اس حوالے سے ایس پی پوٹھوہار رانا وہاب کا کہنا ہے کہ ملزمان اپنی آئی ٹی مہارت کو منفی سرگرمیوں میں استعمال کرکے شہریوں کو انکے قیمتی اثاثے سے محروم کرتے تھے، شہریوں کو انکے قیمتی اثاثے سے محروم کرنے والے اب قانون کی گرفت سے نہیں بچ سکیں گے۔
