کراچی : کلفٹن پولیس نے کامیاب کارروائی کرتے ہوئے چوروں کے3رکنی گروہ کو گرفتار کرلیا، ملزمان کے قبضے سے بڑی تعداد میں غیر ملکی کرنسی اور قیمتی اشیاء برآمد کرلی گئیں۔
تفصیلات کے مطابق کلفٹن پولیس نے انتہائی مطلوب 3رکنی چور گروہ کو اس کے سرغنہ سمیت حراست میں لیا ہے، اس حوالے سے ڈی آئی جی ساؤتھ جاوید اکبر ریاض نے میڈیا کو بتایا کہ گرفتار ملزمان کے قبضے سے بڑی تعداد میں غیرملکی کرنسی برآمد ہوئی ہے۔
اس کے علاوہ گھڑیاں، طلائی زیورات، انگوٹھیاں، چوڑیاں، موبائل فونز کے علاوہ غیر ملکی قیمتی سکے اور دیگر قیمتی اشیاء بھی ملزمان کے پاس موجود تھیں جو برآمد کی گئی ہیں۔
ڈی آئی جی ساؤتھ نے بتایا کہ گرفتار ملزمان ڈیفنس کے مختلف گھروں میں باورچی کا کام کرتے تھے، گرفتار چوروں کا سرغنہ ایک اعلیٰ سرکاری افسر کا خانساماں ہے۔
جاوید اکبر ریاض کے مطابق گذشتہ 10سالوں سے ملزم ایک سرکاری افسر کے گھر کام کر رہا تھا، ملزمان جن گھروں میں کام کرتے واردات سے قبل اس کے برابر والے گھر کی ریکی کیا کرتے تھے۔
پولیس کا کہنا ہے کہ گرفتار ملزمان چوری کی واردات بہت منظم انداز میں اور آسان ہدف کو نشانہ بناتے تھے، چوروں کا یہ گروہ رات کے اندھیرے میں گھر میں داخل ہوکر چوری کی وارداتیں کیا کرتا تھا۔
ڈی آئی جی ساؤتھ نے بتایا کہ ملزمان کو کلفٹن پولیس نے رنگے ہاتھوں گرفتار کیا،اس وقت یہ ملزمان ایک گھر سے لوٹ مار کے بعد فرار ہورہے تھے کہ پکڑے گئے۔
ڈی آئی جی ساؤتھ نے بتایا کہ گرفتاری کے بعد سرکاری افسر کو اپنے قابل اعتماد باورچی کے مجرمانہ عمل پر یقین نہیں آیا،
پولیس کے ریکارڈ سے ایک ملزم کا 2019کا کرمنل ڈیٹا سامنے آگیا ہے، گرفتار ملزمان سے مزید تفتیش جاری ہے۔
