کابل: امریکی جنرل کینتھ مکینزی نے طالبان کو سیاسی مصالحت کا پیغام دیتے ہوئے واضح کیا ہے کہ اگر طالبان نہ رکے تو بمباری بھی جاری رہے گا۔
تفصیلات کے مطابق امریکی سینٹ کام کمانڈر جنرل کینتھ مکینزی نے کابل میں میڈیا سے گفتگو کرتے ہوئے کہا کہ امریکا افغان فورسز کی بھرپور مدد کررہا ہے اور انہیں فضائی بمباری کیلئے فوری کمک فراہم کررہا ہے۔
امریکی جنرل نے طالبان کو سیاسی مصالحت کا پیغام دیتے ہوئے واضح کیا کہ اگر طالبان کی پیش قدمی جاری رہے تو اکتیس اگست کے بعد بھی بمباری کا سلسلہ جاری رہے گا۔
اس سے قبل امریکا نے طالبان سے مذاکرات کی میز پر آنے کا مطالبہ کیا ، اس حوالے سے امریکی وزیر دفاع جنرل آسٹن کا کہنا تھا افغان فورسز کو سب سے پہلے طالبان کی پیش قدمی کو روکنا ہوگا۔
خیال رہے افغانستان کے مختلف اضلاع میں حکومتی فورسز اور طالبان کے درمیان جھڑپیں بدستور جاری ہیں، افغان فورسز نے طالبان کیخلاف آپریشن کیلئے اکتیس صوبوں میں رات کا کرفیو لگا دیا ہے ، کرفیو رات دس بجےسے صبح چار بجے تک جاری رہے گا۔
ایک اندازے کے مطابق طالبان نے ملک کے آدھے حصے پر قبضہ کرلیا ہے جبکہ متعدد بڑے شہروں کے قریب آ رہے ہیں لیکن ابھی تک ان پر قبضہ نہیں کر سکے۔
