اسلام آباد : جنیوا میں ہونے والی بین الاقوامی ڈونرز کانفرنس میں مختلف ممالک اور عالمی اداروں نے سیلاب زدگان کی امداد کیلیے نو ارب ڈالر سے زائد کے اعلانات کیے۔
یہ بات ترجمان دفتر خارجہ نے اپنے جاری بیان میں بتائی ، انہوں نے کہا کہ بین الاقوامی ڈونرز کانفرنس میں پاکستان نے موسمیاتی طور پر مستحکم، دیرپا تعمیرنو اور بحالی کا جامع منصوبہ پیش کیا۔
ترجمان کے مطابق پاکستان نے بحالی کے کاموں کے لئے 16ارب ڈالر سے زائد کا تخمینہ پیش کیا، عالمی برادری نے بھی سیلاب متاثرین کے ساتھ بھرپور اظہار یکجہتی کیا، اس موقع پر مختلف ممالک اور عالمی اداروں نے9ارب ڈالر سے زائد کےاعلانات کیے۔
اس کے علاوہ پاکستان کو سیلاب زدگان کے تباہ شدہ علاقوں کی تعمیرنو اور بحالی کے لیے مزید تعاون کی یقین دہانیاں بھی کرائی گئیں،اور اس کے لیے ایکشن پلان بھی سامنے آیا، جس میں بہترگورننس، ریاستی اداروں کی استعداد کار میں بہتری شامل ہے۔
دفتر خارجہ کے مطابق سیلاب متاثرین کے روزگار اور ذرائع معاش کی بحالی، ان کی سماجی شمولیت، بنیادی خدمات کی بحالی اور ڈھانچہ سازی بھی ایکشن پلان میں شامل ہے
ترجمان دفتر خارجہ نے کہا کہ متاثرین کو صحت بحران، سردی، آئندہ بارشوں سے بچانا اور روزگار فراہمی اولین ترجیح ہے، قدرتی آفات، آئندہ سیلاب سے بچاؤ کے لیے اقدامات طویل المیعاد حکمت عملی کا حصہ ہیں۔
انہوں نے بتایا کہ سرکاری و نجی شعبے کی شمولیت سے جامع مالیاتی منصوبہ مرتب کیا جائے گا، اقوام متحدہ ادارہ ترقی کے تحت منصوبہ سازی مرکز کو مزید فعال کیا جائے گا،
دفتر خارجہ کے مطابق اخراجات کی شفافیت اور اس کی کڑی نگرانی کے لیے مربوط میکانزم تشکیل دیا جائے گا، پاکستان بین الاقوامی شراکت دار معاون گروپ تشکیل دیا جائے گا۔
