ہالی ووڈ کے آسکر انعام یافتہ اداکار جارج کلونی نے میڈیا سے اپنے بچوں کی تصویر شائع نہ کرنے کی اپیل کردی، انہوں نے کہا کہ پریس میں ان کے بچوں کی تصاویر شائع ہونے سے ان کے بچوں کی حفاظت کو خطرات لاحق ہوسکتے ہیں۔
اداکار جارج کلونی نے اشاعتی اداروں سے کہا ہے کہ ان کے بچوں کی تصویر شائع نہیں کیا کریں۔
اس حوالے سے انہوں نے پریس کو ایک خط لکھا اور کہا کہ ان کی اہلیہ انسانی حقوق کی وکیل ہیں، ان کے کام کی نوعیت کی وجہ سے ہم اپنے خاندان کو محفوظ رکھنے کے لیے زیادہ سے زیادہ احتیاط برتتے ہیں۔
جارج کلونی نے کہا کہ اگر رسالوں کے سرورق پر تصویریں شائع ہوئیں تو وہ بچوں کی حفاظت نہیں کر پائیں گے۔ وہ اپنے بچوں کی تصاویر سوشل میڈیا پر بھی پوسٹ نہیں کرتے کہ کہیں انہیں سیکیورٹی خدشات نہ لاحق ہوجائیں۔
یاد رہے کہ جارج کلونی نے انسانی حقوق کی وکیل امل کلونی سے سنہ 2014 میں شادی کی تھی، سنہ 2017 میں جوڑے کے یہاں جڑواں بچوں کی پیدائش ہوئی تھی۔
