The news is by your side.

Advertisement

کرسمس سیزن: جرمن ایئرلائن ہزاروں مسافر ایئرپورٹ پرچھوڑگئی

بون: یورپ میں کرسمس کا سیزن اپنے عروج پر ہے ، جس کے سبب ہفتے اور اتوار کو جرمنی کے شہر فرینکفرٹ کے ایئر پورٹ پر لفتھانسا ایئر لائن کی 88 پروازیں تاخیر کا شکار ہوئیں۔

تفصیلات کے مطابق جرمن ایئر لائن لفتھانسا کے ہزاروں مسافر اپنی پروازیں نہ لے سکے جس کا سبب تعطیلات کے سبب کم اسٹاف اور زیادہ مسافر بتائے جارہے ہیں۔ سکیورٹی چیکنگ پر لوگوں کے ہجوم اور اسٹاف کی کمی کے باعث تین ہزار افراد اپنی پروازوں تک نہ پہنچ پائے۔ مسافروں کو سکیورٹی چیکنگ پر اوسطاً 90 منٹ تک اپنی باری کا انتظار کرنا پڑا۔

فرینکفرٹ ایئر پورٹ کے ٹرمینل ایک سے پرواز کرنے والے لفتھانسا کی جانب سے جاری بیان میں کہا گیا ہے کہ بہت سے مسافر سکیورٹی چینکنگ پر شدید رش کے باعث فلائٹس تک بروقت نہ پہنچ پائے اور جہازوں سے ان کے سامان کو اتارنا پڑا اور یوں ایئر لائن کی 88 پروازیں تاخیر کا شکار ہوئیں۔

عام حالات میں ہفتے اور اتوار کو فرینکفرٹ ايئر پورٹ کے ذريعے ڈیڑھ لاکھ سے ایک لاکھ اسی ہزار تک مسافر سفر کرتے ہیں۔ جبکہ کرسمس سے قبل اس ویک اینڈ پر فرینکفرٹ ایئر پورٹ کے ذریعے دو لاکھ مسافر سفر کے لیے پہنچے اور بظاہر ایئر پورٹ کے پاس اتنی بڑی تعداد میں مسافروں کے لیے ملازمین موجود نہ تھے۔

ایئر پورٹ کو اس لیے بھی تنقید کا سامنا کرنا پڑا کیوں کہ انتظامیہ کی جانب سے مسافروں کو جہاز میں لے جانے والے سامان کو جہاز میں چیک ان کرنے کی تجویز نہ دی گئی جو کہ سکیورٹی پر زیادہ وقت کی بہت بڑی وجہ بنتا ہے۔

لفتھانسا کے ایک سینئر اہلکار ڈیٹلیف کیزر کا کہنا ہے، ’’فرینکفرٹ ایئر پورٹ کو سروس کی فراہمی سے متعلق شدید بحران کا سامنا کرنا پڑا۔ فرینکفرٹ ایئر پورٹ پر 2019ء میں ایک نئے سکیورٹی اسٹیشن کی بنیاد رکھی جائے گی تاکہ زيادہ رش کے مسئلے کو حل کیا جا سکے‘‘۔

Comments

comments

یہ بھی پڑھیں