برلن: نیلے رنگ کے مشہور اینی میٹڈ کردار اسمرف کے مداحوں نے جرمنی میں اس کا روپ دھار کر عالمی ریکارڈ بنانے کی کوشش کی۔
تفصیلات کے مطابق نیلے رنگ کے مشہور اینی میٹڈ کردار اسمرف کے دنیا میں ایسے دیوانے بھی ہیں جو ان کے رنگ میں رنگ کر عالمی ریکارڈ بنانے نکل آئے۔
جرمنی میں منہ پر نیلا پینٹ کیے مخصوص اسٹائل والی سفید ٹوپی پہن کر دوہزار سات سوباسٹھ مداحوں نے نیلے اسمرف کا روپ دھارے گراؤنڈ میں ایک ساتھ جمع ہوکر ورلڈ ریکارڈ بنانے کا دعویٰ کیا ہے۔
جرمنی میں سوئٹزر لینڈ بارڈر کے قریب اس مجمے میں لوگ خوب لطف اندوز ہوئے، منچلوں کی ہلہ گلہ موج مستی میں بچوں نے بھی بھرپور شرکت کی۔
گینس بک آف ورلڈ ریکارڑ انتظامیہ کی جانب سے کہا گیا ہے کہ ورلڈ ریکارڈ بننے کی تصدیق آئندہ ہفتے کی جائی گی، ابھی اعداد وشمار سمیت دیگر پہلوؤں کا جائزہ لیا جارہا ہے۔
اس مخصوص انداز میں ریکارڈ بنانے کا اعزاز ابھی برطانیہ کے پاس ہے، جہاں دو ہزار پانچ سو دس طالب علموں نے مل کر یہ ریکارڈ 2009 میں قائم کیا تھا۔
قبل ازیں فروری 2016 میں جرمنی کے پہاڑی علاقے بلیک فارسٹ میں ہزاروں افراد نے نیلے اسمرف کا روپ دھارکر بڑی تعداد میں ایک جگہ جمع ہو کر عالمی ریکارڈ قائم کرنے کی کوشش کی تھی تاہم وہ ناکام رہے تھے۔
