جے یو آئی کے سیکرٹری جنرل سینیٹر مولانا عبدالغفور حیدری نے ڈپٹی چیئرمین سینیٹ کی حکومتی آفر کی تردید کر دی۔
مولانا عبدالغفور حیدری نے کہا ہے کہ چیئرمین سینیٹ کے پاس تمام پارٹیوں کے ممبران بیٹھے تھے، میٹنگ کے دوران ایسی کوئی گفتگو نہیں ہوئی، میٹنگ کے بعد پرویز خٹک نے میڈیا کے سامنے گفتگو کی۔
مولانا عبدالغفور حیدری نے کہا کہ حکومتی وزیر کی میڈیا کے سامنے گفتگو کی شدید الفاظ میں مذمت کرتا ہوں، جس حکومت کواپوزیشن تسلیم نہیں کرتی اس کی آفر کی حیثیت نہیں۔
ان کا کہنا تھا کہ پی ڈی ایم نے جو فیصلہ کیا ہے ہم اس کے پابند ہے، پی ڈی ایم مکمل طور پر متحد اور متفق ہے، حکومتی وزیر ڈوبتی کشتی کو بچانے کیلئے تاخیری حربے استعمال کر رہے ہیں۔
چیئرمین سینیٹ اور ڈپٹی چیئرمین کے انتخاب سے قبل سیاسی جوڑ توڑ کا سلسلہ جاری ہے، ایسے وقت میں حکومت نے پی ڈی ایم میں شامل اہم جماعت کو ڈپٹی چیئرمین سینیٹ کی سیٹ آفر کردی ہے۔
اپوزیشن میں شامل جے یو آئی (ف) کو ڈپٹی چیئرمین سینیٹ کی سیٹ آفر دے کر بڑا سیاسی فیصلہ کیا ہے، وفاقی وزیر دفاع پرویز خٹک اور چیئرمین سینیٹ صادق سجنرانی پر مشتمل حکومتی وفد نے یہ آفر جے یو آئی سیکرٹری جنرل عبدالغفور حیدری کو دی۔
اپوزیشن اور حکومتی رہنماؤں نے اسلام آباد میں اہم ملاقات بھی کی، ملاقات کے بعد میڈیا سے گفتگو کرتے ہوئے وفاقی وزیر پرویز خٹک نے کہا کہ عبدالغفور حیدری کو آفر ہے کہ وہ ہمارے ڈپٹی چیرمین سینٹ بن جائے۔