گھوٹکی : پنجاب سے کراچی جانے والی مسافر ٹرین بڑے حادثے سے بال بال بچ گئی اور خوش قسمتی سے واقعے میں کوئی جانی نقصان نہیں ہوا۔
تفصیلات کے مطابق گھوٹکی میں پنجاب سے کراچی جانے والی مسافر ٹرین کی بوگیاں انجن سے الگ ہوگئیں، واقعہ گھوٹکی کے علاقے محمد پور کے قریب پیش آیا۔
ریلوے ذرائع نے بتایا کہ ٹرین کا انجن چند بوگیوں کے ساتھ تیز رفتاری سے کئی کلومیٹر آگے نکل گیا جبکہ سات بوگیاں پیچھے رہ گئیں تاہم خوش قسمتی سے واقعے میں کوئی جانی نقصان نہیں ہوا۔
واقعے کے بعد الگ ہونے والی بوگیوں میں سوار مسافر شدید پریشانی کا شکار ہو گئے۔
مسافروں کا کہنا ہے کہ وہ چار گھنٹے سے زائد وقت تک بوگیوں میں پھنسے رہے اور انہیں بروقت متبادل انتظام فراہم نہیں کیا گیا۔
ریلوے انتظامیہ کی جانب سے بوگیوں کو واپس لے جانے یا مسافروں کو منزل تک پہنچانے کے لیے انتظامات تاحال مکمل نہیں کیے جا سکے۔
واقعے کے بعد ریلوے حکام نے تحقیقات شروع کر دی ہیں تاکہ بوگیوں کے انجن سے الگ ہونے کی وجوہات معلوم کی جا سکیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں