راولپنڈی : جی ایچ کیو نے صحافی ارشد شریف کے قتل کی تحقیقات کیلئے کمیشن تشکیل دینے کیلئے حکومت پاکستان کو خط لکھ دیا۔
تفصیلات کے مطابق سینئر صحافی ارشد شریف کے کینیا میں جاں بحق ہونے کے معاملے پر جی ایچ کیو نے حکومت پاکستان سے مکمل تحقیقات کے لئے کمیشن تشکیل دینے کے لئے خط لکھ دیا۔
خط میں کہا گیا ہے کہ کمیشن کینیا پولیس کے ہاتھوں ارشد شریف کی موت کی مکمل تحقیقات کرے۔
خط میں بے بنیاد الزامات لگانے والوں کے خلاف آئین وقانون کے مطابق کارروائی کی استدعا کی گئی ہے۔
اس سے قبل وزیراعظم شہباز شریف نے صحافی ارشد شریف کے جاں بحق ہونے کے واقعے کی تحقیقات کیلئے جوڈیشل کمیشن بنانے کا فیصلہ کرلیا۔
وفاقی وزیراطلاعات مریم اورنگزیب نے بتایا کہ وزیراعظم نے ہائی کورٹ کےجج کی سربراہی میں جوڈیشل کمیشن بنانے کا فیصلہ کیا ہے ، کمیشن سربراہ حقائق کے تعین کیلئے سول سوسائٹی ،میڈیا سےبھی رکن لے سکیں گے۔
مریم اورنگزیب کا کہنا تھا کہ یہ فیصلہ ارشد شریف کی شہادت کے اصل حقائق کے تعین کیلئے کیا گیا۔
