کراچی: ایڈیشنل انسپکٹر جنرل (آئی جی) کراچی ڈاکٹر امیر شیخ کو ان کے عہدے سے ہٹا کر غلام نبی میمن کو کراچی پولیس چیف تعینات کر دیا گیا۔
تفصیلات کے مطابق سندھ حکومت کی جانب سے پولیس آرڈر پاس ہونے کے بعد پہلا بڑا فیصلہ کرتے ہوئے ایڈیشنل آئی جی کراچی ڈاکٹر امیر شیخ کو ہٹانے کا حکم دے دیا گیا۔
ایڈیشنل آئی جی کراچی ڈاکٹر امیر شیخ نے تقرری کے بعد اپنی مدت بھی پوری نہیں کی، ان کی تقرری کی مدت ملازمت ڈیڑھ سال بنتی ہے۔ امیر شیخ 11 ماہ قبل کراچی پولیس چیف بنے تھے۔ ذرائع کا کہنا ہے کہ ارشاد رانجھانی کیس کے بعد سندھ سرکار امیر شیخ سے سخت ناراض تھی۔
ڈاکٹر امیر شیخ کو ہٹانے کے بعد غلام نبی میمن کو کراچی پولیس چیف تعینات کر دیا گیا۔ ان کے علاوہ بھی سندھ پولیس میں بڑے پیمانے پر تبادلے و تقرریاں کی گئی ہیں۔
امیر شیخ کو ایڈیشنل آئی جی آپریشن تعینات کیا گیا ہے، ایڈیشنل آئی جی حیدر آباد کا بھی تبادلہ کردیا گیا۔ ولی اللہ ڈل کو ایڈیشنل آئی جی اسپیشل برانچ سے ایڈیشنل آئی جی حیدر آباد تعینات کردیا گیا۔
عمران یعقوب منہاس کو ایڈیشنل آئی جی اسپیشل برانچ، فرحت علی جونیجو کو ڈی آئی جی اسپیشل برانچ اور قمر زمان کو ڈی آئی جی ٹریفک لائسنس اور ٹریننگ تعینات کر دیا گیا ہے۔
تمام تقرریوں اور تبادلوں کے نوٹیفکیشن جاری کردیے گئے ہیں۔
