لاہور: پنجاب کے دارالحکومت میں لڑکی نے 45 سالہ شہری کو موت کے گھاٹ اتار دیا۔
اے آر وائی نیوز کے مطابق لاہور کے علاقے شفیق آباد میں ایک روز قبل فائرنگ کا واقعہ پیش آیا جس میں 45 سالہ عاطف نامی شہری جاں بحق ہوا تھا۔
واقعے کی اطلاع ملنے کے بعد تھانہ شفیق آباد کی نفری جائے وقوعہ پر پہنچی اور انہوں نے مقتول کی لاش کو قبضے میں لے کر ضابطے کی کارروائی کے لیے اسپتال منتقل کیا۔ تفتیشی افسر کے مطابق مقتول عاطف فیصل آباد کے علاقے گلستان کالونی کا رہائشی تھا۔
پولیس نے شبہ ظاہر کیا تھا کہ قتل کا واقع دیرینہ دشمنی کا شاخسانہ ہوسکتا ہے۔ شفیق آباد تھانے میں نامعلوم ملزمان کے خلاف مقدمہ درج کر کے پولیس نے واقعے کی تحقیقات کا آغاز کیا۔
قبل ازیں پولیس نے فرانزک ٹیم کی مدد سے جائے وقوعہ سے تمام شواہد اکٹھے کیے جن کی روشنی میں تحقیقات شروع کی گئیں۔
پولیس اپنی تحقیقات کے دوران اس نتیجے پر پہنچی کہ مقتول عاطف کو مخالفین نے لڑکی کے ہاتھوں قتل کروایا، جس کی ویڈیو بھی منظر عام پر آگئی ہے۔
