The news is by your side.

Advertisement

لاہور میں مبینہ مقابلے کی زد میں آکر لڑکی جاں بحق

لاہور: صوبہ پنجاب کے دارالحکومت میں ڈولفن فورس اور ڈاکوؤں کے درمیان مبینہ مقابلے کی زد میں آکر 22 سالہ لڑکی جاں بحق ہوگئی۔

اے آر وائی نیوز کی رپورٹ کے مطابق لاہور کے علاقے وحدت روڈ پر ڈولفن اہلکاروں اور ڈاکوؤں کے درمیان فائرنگ کا تبادلہ ہوا جس کے نتیجے میں فاطمہ نامی راہ گیر طالبہ گولی لگنے سے جاں بحق ہوگئی، وزیر اعلیٰ پنجاب نے واقعہ کا نوٹس لے کر آئی جی پنجاب سے رپورٹ طلب کرلی۔

عینی شاہدین کے مطابق زخمی طالبہ کو ایمبولینس نہ ہونے کے سبب رکشے میں اسپتال منتقل کیا گیا جہاں وہ زخموں کی تاب نہ لاتے ہوئے چل بسی۔

ذرائع کا کہنا ہے کہ لڑکی دو طرفہ فائرنگ کے تبادلے میں جاں بحق ہوئی ہے، یہ معلوم نہیں ہوسکا کہ آیا فاطمہ کو ڈاکوؤں کی گولی لگی ہے یا وہ ڈولفن فورس اہلکاروں کی فائرنگ کی زد میں آئی اس کی تفتیش کا آغاز کردیا گیا ہے۔

نمائندہ اے آر وائی نیوز کے مطابق جاں بحق لڑکی کی لاش کو ضابطے کی کارروائی کے لیے مردہ خانے منتقل کردیا گیا ہے تاہم فاطمہ کے والدین نے پوسٹ مارٹم کروانے سے انکار کردیا، والدہ کا کہنا تھا کہ ہم کوئی کارروائی نہیں‌ کرنا چاہتے بس بیٹی واپس لادو۔

ذرائع کے مطابق ڈولفن اہلکاروں نے تینوں ڈاکوؤں کو گرفتار کرلیا، پولیس کے مطابق گرفتار ہونے والے ڈاکو ریکارڈ یافتہ ہیں اوران کے خلاف درجنوں ڈکیتی کے مقدمات درج ہیں۔

پولیس کا کہنا ہے کہ گرفتار ڈاکوؤں کی شناخت حسن، ارشد اور فیصل کے نام سے ہوئی ہے، ملزمان سے تحقیقات میں مزید انکشافات متوقع ہیں۔

Comments

یہ بھی پڑھیں