جنیوا: پولیو کے خاتمے کے عالمی پروگرام نے 5.1 ارب ڈالر کے عالمی فنڈ کا اعلان کر دیا۔
تفصیلات کے مطابق پولیو کے مکمل خاتمے کے لیے 5.1 ارب ڈالر کے عالمی فنڈ کا اعلان کر دیا گیا ہے، مختص کردہ عالمی فنڈ کا بڑا حصہ پاکستان اور افغانستان میں انسدادِ پولیو مہم پر صرف ہوگا۔
اس وقت صرف پاکستان اور افغانستان ہی ایسے ممالک ہیں جہاں پولیو موجود ہے، جب کہ دنیا بھر سے پولیو کا خاتمہ کیا جا چکا ہے۔
پولیو کے خاتمے سے متعلق حکومتوں، غیر سرکاری اداروں اور صحت کی تنظیموں کے مشترکہ عالمی پروگرام ’گلوبل پولیو اریڈیکیشن انیشی ایٹیو‘ (پی جی ای آئی) نے دنیا بھر سے 2026 تک پولیو کے مکمل خاتمے کا اعادہ کیا۔
پاکستان کی پولیو فری ملک بننے کی طرف تیزی سے پیش قدمی
ایک بیان میں عالمی پروگرام نے کہا ہے کہ پولیو کا مکمل خاتمہ کرنے کے لیے فوری اور منظم کوششوں کی پہلے سے زیادہ ضرورت ہے۔
واضح رہے کہ عالمی ادارہ صحت نے کہا ہے کہ گزشتہ برس کرونا وائرس کی عالمی وبا کے باعث انسدادِ پولیو پروگرام پر بھی توجہ کم ہوگئی تھی، جس کے نتیجے میں 2020 کے دوران پولیو کیسز کی تعداد میں اضافہ ہوا۔
گزشتہ برس پولیو کیسز ایک ہزار 226 تک پہنچے، جب کہ 2018 میں یہ تعداد صرف 138 رہ گئی تھی، امراض اور وباؤں کے تدارک سے متعلق امریکی ادارے سی ڈی سی کا بھی کہنا ہے کہ پولیو کے خلاف کوششیں دگنی کرنے کی ضرورت ہے۔
