کراچی: بلین مارکیٹ میں سونے کی قیمتوں میں کمی کے مثبت اثرات مقامی صرافہ بازاروں پر بھی نظر آئے اور نرخوں میں نمایاں کمی ریکارڈ کی گئی۔
بین الاقوامی مارکیٹ میں کرونا وائرس کے خوف کے پیش نظر سرمایہ کاروں نے ٹریڈنگ کے دوران محتاط رویہ اختیار کیا جس کی وجہ اسٹاک میں مندی کے بادل چھائے رہے۔
عالمی مارکیٹ میں سونے کے ریٹ 1588 ڈالر فی اونس کھلے، مندی کی وجہ سے قیمت میں مزید کمی ریکارڈ کی گئی۔
بلین مارکیٹ میں سونا 57 ڈالر کمی کے بعد 1531 ڈالر فی اونس کی سطح پر پہنچا اور اسی بھاؤ میں لین دین ہوئی۔
مزید پڑھیں: سونے کی قیمتوں میں پھر کمی
آل پاکستان جیولرز ایسوسی ایشن کے چیئرمین محمد ارشد کے مطابق عالمی مارکیٹ میں ہونے والی کمی کے بعد مقامی صرافہ بازاروں میں بھی سونے کی فی تولہ اور دس گرام کی قیمتوں میں بالترتیب 3200 اور 2743 روپے کی کمی ریکارڈ کی گئی۔
حالیہ کمی کے بعد آج چودہ مارچ کو ملک بھر کے صرافہ بازاروں میں فی تولہ سونا 90 ہزار 300 جبکہ دس گرام 77 ہزار 417 روپے کے ساتھ فروخت ہوا۔
آج بتاریخ 14 مارچ 2020 کے ریٹ
فی تولہ : 90،300
دس گرام: 77،417
کراچی، حیدرآباد، سکھر، لاہور، فیصل آباد، ملتان، اسلام آباد، راولپنڈی، پشاور اور کوئٹہ کے صرافہ بازاروں میں سونے کی لین دین نئے ریٹ کے ساتھ ہوئی۔
یاد رہے کہ گزشتہ روز عالمی مارکیٹ میں سونا 47 ڈالر کمی کے بعد 1588 ڈالر فی اونس تک پہنچا تھا، جس کے بعد مقامی صرافہ بازاروں میں سونے کی فی تولہ قیمت میں 900 روپے کی کمی ریکارڈ کی گئی تھی۔