(یکم اکتوبر 2025): پاکستان میں فی تولہ سونے کی قیمت میں مزید اضافے ریکارڈ کیا گیا ہے۔
تفصیلات کے مطابق بین الاقوامی اور مقامی مارکیٹ میں سونے کی قیمت نئی بلند ترین سطح پر پہنچ گئی، آج فی تولہ سونے کی قیمت میں 3 ہزار روپے سے بھی زائد کا اضافہ ریکارڈ کیا گیا ہے۔
آل پاکستان جیمز اینڈ جیولرز ایسوسی ایشن نے بتایا مقامی صرافہ مارکیٹوں میں فی تولہ سونا 3 ہزار 500 روپے مہنگا ہوکر 4 لاکھ 10 ہزار 278 روپے کا ہوگیا۔
اسی طرح 10 گرام سونا 3001 روپے اضافے کے بعد 3 لاکھ 51 ہزار 747 روپے میں فروخت ہو رہا ہے، بین الاقوامی مارکیٹ میں بھی قیمتوں میں اضافہ دیکھا گیا، جہاں فی اونس سونا 35 ڈالر بڑھ کر 3 ہزار 890 ڈالر کا ہوگیا۔
ماہرین کے مطابق ڈالر کی قدر میں اتار چڑھاؤ اور عالمی مارکیٹ میں بڑھتی مانگ مقامی سطح پر بھی سونے کی قیمتوں میں اضافے کا باعث بنی ہے، مقامی جیولرز کا کہنا ہے کہ سونے کی بلند قیمت کی وجہ سے کاروبار متاثر ہو رہا ہے۔
پاکستان میں آج ڈالر اور دیگر کرنسیوں کی قیمت
یاد رہے کہ سونا خریدنا روایتی طور پر محفوظ سرمایہ کاری سمجھا جاتا ہے جس کی قیمت افراط زر، سیاسی اور معاشی عدم استحکام کے اوقات میں بڑھ جاتی ہے۔
اسے صدیوں سے کرنسی اور دولت کی شکل کے طور پر استعمال کیا جاتا رہا ہے، جب سرمایہ کار دوسرے اثاثوں کے بارے میں غیر یقینی محسوس کرتے ہیں، تو وہ اکثر سونا خریدے ہیں۔
پاکستان میں گزشتہ برس سونے کی قیمت کے تعین کے طریقہ کار میں تبدیلی کردی گئی تھی، جس کے تحت سونے کی قیمت انٹرنیشنل مارکیٹ ریٹ سے 20 ڈالر فی اونس زیادہ مقرر کی گئی۔
انجم وہاب اے آر وائی نیوز سے وابستہ ہیں اور تجارت، صنعت و حرفت اور دیگر کاروباری خبریں دیتے ہیں