کراچی: ملک میں سونے کی قیمت میں کمی کا سلسلہ جاری ہے، فی تولہ سونے کی قیمت میں 1700 روپے کمی ریکارڈ کی گئی، ڈالر کی قدر میں بھی کمی کا سلسلہ جاری ہے۔
اے آر وائی نیوز کی رپورٹ کے مطابق چیئرمین آل پاکستان جیولرز مینوفیکچررز ایسوسی ایشن محمد ارشد کا کہنا ہے کہ ملک میں سونے کی فی تولہ قیمت 1700 روپے کمی کے بعد ایک لاکھ 11 ہزار 700 روپے ہوگئی۔
فی تولہ قیمت میں کمی کے بعد 10 گرام سونے کی قیمت 1371 روپے کمی سے 95 ہزار 764 روپے پر آگئی، عالمی مارکیٹ میں بھی سونے کی قیمتوں میں کمی کا رجحان رہا، سونا 18 ڈالر کمی کے بعد 1872 ڈالر فی اونس پر ٹریڈ ہوا۔
انٹر بینک میں ڈالر کی قدر میں کمی
فاریکس ڈیلرز کے مطابق انٹربینک میں ڈالر 36 پیسے سستا ہوگیا، ڈالر 5 ماہ کی کم ترین سطح 160 روپے 26 پیسے پر بند ہوا، گزشتہ روز ڈالر کی قیمت 160.62 پیسے ریکارڈ کی گئی تھی۔
پاکستان اسٹاک ایکسچینج میں مندی کا رجحان
دوسری جانب پاکستان اسٹاک ایکسچینج میں شدید مندی کا رجحان رہا جس کے باعث سرمایہ کاروں کو 200 ارب روپے سے زائد کا نقصان اٹھانا پڑا، انڈیکس 41 ہزار اور 40 ہزار کی نفسیاتی حد کھو بیٹھا۔
کاروبار کے دوران انڈیکس میں 1911 پوائنٹس کی کمی ریکارڈ کی گئی، 100 انڈیکس 1298 پوائنٹس کی کمی پر بند ہوا، 100 انڈیکس 3.15 فیصد کمی سے 39 ہزار 888 کی سطح پر بند ہوا۔
