اسلام آباد: آج ای سی سی اجلاس میں اسٹیل ملز ملازمین کے لیےگولڈن ہینڈ شیک پلان منظور کر لیا گیا، جب کہ دوسری طرف ای سی سی نےگیس میٹرز کا رینٹ 20 سے بڑھا کر 40 روپے کر دیا ہے۔
تفصیلات کے مطابق آج اسلام آباد میں مشیر خزانہ حفیظ شیخ کی زیر صدارت اقتصادی رابطہ کمیٹی کا اجلاس منعقد ہوا، ذرایع کا کہنا ہے کہ اجلاس میں اسٹیل ملز ملازمین کے لیےگولڈن ہینڈ شیک پلان منظورکیا گیا۔
ذرایع نے بتایا کہ گولڈن ہینڈ شیک کے لیے 19 ارب 65 کروڑ روپے فنڈز کی منظوری بھی دی گئی ہے، اسٹیل ملز کے 49 فی صد ملازمین کو گولڈن ہینڈ شیک ملے گا۔ اجلاس میں نان پٹیشنرز ملازمین کو واجبات کی ادائیگی کے لیے بھی 11.6 ارب کی منظوری دی گئی۔
ادھر قدرتی گیس کے گھریلو صارفین کے لیے بری خبر بھی دی گئی ہے، ذرایع کے مطابق ای سی سی نے گیس میٹرز کا رینٹ 20 سے بڑھا کر 40 روپے کر دیا ہے۔
اجلاس میں صارفین سےگیس انفرا اسٹرکچر ڈیویلپمنٹ سیس کے پرانے واجبات وصول کرنے کا فیصلہ کیا گیا، جے آئی ڈی سی کے ایک تہائی واجبات بھی وصول کرنے کا فیصلہ کیا گیا ہے، واجبات کی مد میں 22 ارب روپے وصول کیے جائیں گے، اس سلسلے میں گھریلو، کمرشل، تندور، سیمنٹ اور کھاد سیکٹر کو استثنیٰ ہوگا۔
