دنیا کے سب سے بڑے سرچ انجن گوگل نے اپنا آج کا ڈوڈل پاکستان کے یومِ آزادی کی مناسبت سے پاکستان میں موجود دنیا کی سب سے قدیم ثقافت سے منسوب کردیا ہے، جبکہ فیس بک نے بھی اپنے صارفین کو جشنِ آزادی کی مبارک باد دی ہے۔
گوگل ڈوڈل ‘ بین الاقوامی سرچ انجن کے آن سکرین لوگو کا نام ہے جسے وہ اکثر اہم دنیاوی معاملات کی مناسبت سے تبدیل کردیا کرتا ہے۔
اس مرتبہ گوگل نے اپنے ڈوڈل امیج میں پاکستان میں موجود دنیا کی قدیم ترین وادی مہران کی تہذیب کو اجاگر کیا ہے، ڈوڈل امیج میں موہن جو ڈارو سے ملنے والے آثارِ قدیمہ کو اجاگر کیا گیا ہے جن میں موہن جو ڈارو کا مہا پجاری، ڈانسنگ گرل اور وہاں سے نکلنے وال دیگر نوادرات کو دکھایا گیا ہے۔
وادی مہران کی تہذیب کا شمار دنیا کی قدیم ترین تہذیب کے طورپر کیاجاتا ہے اور اسے ہڑپہ کی تہذیب بھی کہا جاتا ہے، موہن جو ڈارو اس تہذ یب کا مرکز تھا، اس کی دریافت 1920 میں ہوئی تھی اور ماہرین آثارقدیمہ تاحال اس کی زبان پڑھنے سے قاصر ہیں۔
دریں اثنا دنیا کی سب سے بڑی سوشل میڈیا ویب سائٹ فیس بک نے بھی پاکستان کے یوم آزادی کے موقع پر پاکستان میں موجود اپنے صارفین کو جشن آزادی کی مبارک باد دی ہے۔
پڑھیں : گوگل کا عبدالستار ایدھی کو خراج عقیدت
فیس بک نے مبارک باد کے پیغام میں کہا ہے کہ وہ تمام افراد جنہوں نے پاکستان کی آزادی کے لیے جدوجہد کی، ہم انہیں یاد کرتے ہیں اور ان کی خدمات کو عزت کی نگاہ سے دیکھتے ہوئے جشن آزادی منانے والوں کو مبارک باد دیتے ہیں۔
گوگل نے ڈوڈل استاد نصرت فتح علی خان کے نام کردیا*
اس سے قبل گوگل پاکستان کے مایہ ناز قوال استاد نصرت فتح علی خان کی سالگرہ پر بھی اپنا گوگل ڈوڈل تبدیل کیا تھا۔
