گورکھ پور: بھارتی ریاست اترپردیش میں شادی کے دوران دلہن کی مانگ میں سندور کسی اور نے بھر دیا، دلہا ہکا بکا دیکھتا رہا، اس واقعے کی ویڈیو سوشل میڈیا پر وائرل ہو گئی۔
حقیقی زندگی کے واقعات بعض اوقات فلموں میں دکھائے جانے والے واقعات کو پیچھے چھوڑ دیتے ہیں اور گورکھپور، اتر پردیش میں ہونے والی یہ عجیب و غریب شادی اس کی ایک بہترین مثال ہے۔
شادی کے دوران جب دولہا اور دلہن ہاروں کا تبادلہ کرنے ہی والے تھے، اچانک دلہن کا دھتکارا ہوا عاشق پنڈال میں آیا اور اس نے عجیب حرکت کر ڈالی، شادی میں موجود کسی شخص نے یہ سارا واقعہ ریکارڈ کر لیا اور یہ ویڈیو اب مختلف سوشل میڈیا پلیٹ فارمز پر وائرل ہو رہی ہے۔
یہ واقعہ گورکھپور کے علاقے بدھٹ کے ہارپور میں یکم دسمبر کو اس وقت رونما جب ایک شادی کی تقریب جاری تھی، وائرل ویڈیو میں دولہا اور دلہن رشتہ داروں سے گھرے اسٹیج پر کھڑے دکھائی دے رہے ہیں۔
کچھ رسومات کے بعد جیسے ہی دولہا دلہن پر ورمالا ڈالنے کے لیے آگے بڑھا، ایک آدمی اوپر آیا جس نے اپنا منہ اسکارف میں ڈھکا ہوا تھا، اس شخص نے اچانک دلہن کے ماتھے پر زبردستی سینڈور لگایا، جب کہ اچانک حملے سے دلہن گھبرا گئی اور خود کو بچانے کی کوشش کرنے لگی۔
A video of #Gorakhpur district of #UttarPradesh has gone viral where a jilted lover of the bride enters the wedding and forcibly completed the vermilion ceremony of the wedding while the groom was performing the garland ritual on the stage.#weddingpic.twitter.com/kcpVGFwePx
— Arvind Chauhan (@Arv_Ind_Chauhan) December 6, 2021
بتایا جاتا ہے کہ یہ شخص دلہن کا سابق عاشق تھا جو کچھ مہینے پہلے کام کے لیے شہر سے باہر گیا تھا، اس دوران لڑکی کی شادی کا وعدہ کسی اور سے ہوا اور جب اس شخص کو اس کا علم ہوا تو اس نے فلمی انداز میں شادی میں مداخلت کرنے کا فیصلہ کیا۔
جب لڑکے نے سندور بھرا تو کچھ دیر دلہا سمیت تمام رشتے دار دنگ کھڑے دیکھتے رہے اور انھیں سمجھ نہ آیا کہ یہ کیا ہوا ہے، لیکن پھر لڑکی نے بھی سندور لگ جانے کے بعد اپنا گھونگھٹ اتارا اور سندور مٹانے کی کوشش کی۔
زبردستی سندور لگانے کے ساتھ ہی لڑکا جیب سے کچھ مزید چیزیں نکالنے لگا، لیکن تب تک فیملی کو ہوش آ گیا، اور وہ اس پر چڑھ دوڑے اور اسے نیچے گرا کر اس کی خوب پٹائی کر ڈالی۔
خاندان کے کچھ افراد نے 112 پر کال کر کے پولیس کو بھی بلوا لیا، یہ شادی پھر اگلے ہی دن ہو سکی، تاہم پرانے عاشق کو سمجھا بجھا کر گھر بھیجا گیا۔
