اسلام آباد: وزیراعظم کے معاون خصوصی برائے اطلاعات لیفٹیننٹ جنرل (ر) عاصم سلیم باجوہ نے دیامیر بھاشا ڈیم کی تعمیر شروع کرنے کا اعلان کردیا۔
اے آر وائی نیوز کی رپورٹ کے مطابق معاون خصوصی برائے اطلاعات عاصم سلیم باجوہ نے سماجی رابطے کی ویب سائٹ ٹویٹر پر اپنے پیغام میں کہا کہ بھاشا ڈیم کی تعمیر کا اعلان ہماری نسلوں کے لیے تاریخ ساز خبر ہے، یہ ہماری نسلوں کے لیے بہت حوصلہ افزا بات ہے۔
عاصم سلیم باجوہ نے کہا کہ ڈیم سے 16 ہزار ملازمتیں، 4500 میگاواٹ بجلی میسر آئے گی، ڈیم کی تعمیر سے لاکھوں ایکڑ زمین سیراب ہوگی۔
انہوں نے مزید کہا کہ منصوبے سے تربیلا ڈیم کی عمیر 35 سال بڑھ جائے گی۔
Announcing to start construction of Diamer Bhasha Dam today is historic news for all generations of Pakistan,a huge stimulus for our economy,create 16500 jobs,generate 4500 MW Hydel Power&irrigate 1.2 m acres agri land,enhance Tarbela Dam’s age by 35 yrs #pakistanmakingprogress
— Asim Saleem Bajwa (@AsimSBajwa) May 11, 2020
واضح رہے کہ اس سے قبل وزیراعظم عمران خان کی زیر صدارت ڈیموں کی تعمیر سے متعلق اجلاس ہوا تھا جس میں وزیراعظم کو بریفنگ دی گئی تھی بھاشا ڈیم سے متعلق امور کو حل کرلیا گیا ہے۔
وزیراعظم کو بریفنگ میں بتایا گیا تھا کہ ڈیم کی تعمیر سے ساڑھے 16 ہزار ملازمتیں پیدا ہوں گی، ساڑھے 4 ہزار میگا واٹ سستی بجلی پیدا ہوگی، وزیراعظم نے ڈیم کی تعمیراتی سرگرمیاں فوری شروع کرنے کی ہدایت دی تھی۔
وزیراعظم عمران خان کا کہنا تھا کہ پانی کے ذخائر کو محفوظ بنانا حکومت کی اولین ترجیح ہے، ڈیموں سے توانائی کی ضروریات پورا کرنے میں مدد ملے گی۔
خیال رہے کہ سابق چیف جسٹس آف پاکستان جسٹس ثاقب نثار نے دیامیر بھاشا اور مہمند ڈیم کی تعمیر کیلئے فنڈ قائم کیا تھا جس میں شہریوں سے چندہ جمع کرانے کی اپیل کی گئی تھی۔
بعد ازاں اس فنڈ کا نام سپریم کورٹ آف پاکستان اینڈ وزیراعظم دیامیر بھاشا اینڈ مہمند ڈیم فنڈ کردیا گیا تھا۔
