اسلام آباد : حکومت نے نیشنل ایمرجنسی ہیلپ لائن قائم کرنے کا فیصلہ کرلیا اور وزیراعظم نے نیشنل ہیلپ لائن نمبر کے قیام کو 2 ماہ میں مکمل کرنے کی ہدایت کردی ہے۔
تفصیلات کے مطابق لنک روڈ زیادتی کیس میں حکومت نے نیشنل ایمرجنسی ہیلپ لائن قائم کرنے کا فیصلہ کرلیا ، اس حوالے سے وزیر اعظم عمران خان نے پی ایم ڈلیوری یونٹ کو اہم ٹاسک سونپ دے دیا ہے۔
وزیراعظم ڈلیوری یونٹ نے نیشنل ایمرجنسی ہیلپ لائن پرکام کا آغاز کر دیا ہے، نیشنل ایمرجنسی ہیلپ لائن کے لیے الگ نظام تشکیل دیا جائے گا اورایمرجنسی صورتحال میں پورے ملک کیلئے ایک ایمرجنسی ہیلپ لائن نمبر ہوگا جبکہ کسی بھی ایمرجنسی کی صورت میں عوام کو ایک مخصوص نمبر میسر دیا جائے گا۔
وزیر اعظم نے نیشنل ہیلپ لائن نمبر کے قیام کو 2 ماہ میں مکمل کرنے کی ہدایت کردی ہے، وزیراعظم آفس کی جانب سے بیان میں کہا گیا ہے کہ تمام ایمرجنسی ہیلپ لائن نمبرز کو نئے نظام سےمنسلک کیا جائے گا اور ہیلپ لائن نمبرٹول فری ہو گا۔
وزیراعظم آفس کا کہنا تھا کہ نیشنل ہیلپ لائن نمبر سے ناگہانی صورت میں فوری مددممکن ہوگی، نئے سسٹم میں جدید ٹیکنالوجی کا استعمال کیا جائے گا اور ملک کی موبائل کمپنیوں سےمعاونت حاصل کی جائے گی۔
بیان میں کہا گیا کہ نظام مؤثر،مستحکم بنانے کیلئےقانون سازی کی جائے گی جبکہ قانون سازی کے لیے صوبوں سے بھی مشاورت ہو گی۔
