استنبول: گورنر سندھ عمران اسماعیل نے میئر استنبول سے شہر میں زیر تعمیر میٹرو کی رپورٹ شیئر کرنے کی درخواست کی ہے۔
تفصیلات کے مطابق گورنر سندھ عمران اسماعیل نے آج ترکی میں استنبول کے میئر اکرم امام اوغلو ( Ekrem İmamoğlu) سے ملاقات کی، جس میں پاکستان اور ترکی کے تعلقات میں مزید فروغ سمیت باہمی دل چسپی کے دیگر امور پر تبادلہ خیال کیا گیا۔
استنبول میں بے روزگار پاکستانیوں کے لیے مناسب روزگار کی فراہمی کے حوالے سے بھی تفصیلی گفتگو کی گئی، دونوں رہنماؤں میں کراچی اور استنبول کو سسٹر سٹیز بنانے پر بھی اتفاق رائے ہوا۔
گورنر سندھ نے استنبول کے میئر کو کراچی آنے کی دعوت دی، جو انھوں نے خوش دلی کے ساتھ قبول کر لی ہے۔
استنبول میں 120 کلو میٹر پر مشتمل میٹرو کی تعمیر جاری ہے، گورنر سندھ نے زیر تعمیر میٹرو کی رپورٹ شئیر کرنے کی درخواست کی، جس پر میئر کی جانب سے متذ کرہ رپورٹ جلد شیئر کرنے کی یقین دہانی کرائی گئی۔
Visited the office of Mayor, Istanbul Ekrem İmamoğlu today & discussed,in particular,the Mass Transit in Istanbul. Have also invited a team of road experts for improvements in Karachi Traffic System. Invitation to visit Karachi was also extended to him & he graciously accepted. pic.twitter.com/q8L0vD9Eh4
— Imran Ismail (@ImranIsmailPTI) October 28, 2021
استنبول ماس ٹرانزٹ سسٹم کی طرز پر کراچی میں بھی ماڈرن ٹرانسپورٹ نظام کے لیے ترکی کے ماہرین پر مشتمل ٹیم کو گورنر سندھ کی جانب سے کراچی کے دورے کی دعوت دی گئی۔
بلقان شہر میں ماہ نومبر میں سمٹ کا انعقاد ہو رہا ہے، جس میں شرکت کے لیے گورنر سندھ کو میئر استنبول کی جانب سے خصوصی دعوت دی گئی۔ گورنر سندھ نے 29 اکتوبر ترکی کے قومی دن کے حوالے سے مبارک باد اور نیک خواہشات کا بھی اظہار کیا۔
