گورنر سندھ سعید الزماں صدیقی اسپتال سے ڈسچارج -
The news is by your side.

Advertisement

گورنر سندھ سعید الزماں صدیقی اسپتال سے ڈسچارج

کراچی: گورنر سندھ جسٹس ریٹائرڈ سعید الزماں صدیقی کو صحت یاب ہونے کے بعد اسپتال سے ڈسچارج کردیا گیا۔ وہ گزشتہ کئی روز سے علیل اور اسپتال میں داخل تھے۔

گزشتہ ایک ماہ سے کراچی کے نجی اسپتال میں زیر علاج گورنر سندھ کی طبعیت سنبھل گئی۔ ڈاکٹرز نے معائنے کے بعد انہیں گھر جانے کی اجازت دے دی جس کے بعد وہ گورنر ہاؤس آگئے اور کام شروع کردیا۔

جسٹس ریٹائرڈ سعید الزماں صدیقی گورنر سندھ کے عہدہ کا حلف اٹھاتے ہی بیمار ہوگئے تھے۔ انہیں 13 نومبر کی رات سینے میں تکلیف کی شکایت پر اسپتال میں داخل کیا گیا تھا۔

مزید پڑھیں: گورنر سندھ کو سانس لینے میں دشواری کا سامنا ہے، ڈاکٹرز

ڈاکٹرز کے مطابق گورنر سندھ اب روبصحت ہیں۔ معالجین نے انہیں آرام کا مشورہ دیتے ہوئے اسپتال سے ڈسچارج کر دیا۔ اسپتال سے ڈسچارج ہونے کے بعد گورنر سندھ کو ان کی ذاتی رہائش گاہ منتقل کیا گیا تاہم دوپہر میں وہ گورنر ہاؤس پہنچ گئے۔

دوسری جانب گورنر ہاؤس کے ترجمان کا کہنا تھا کہ گورنر کسی وقت بھی گورنر ہاؤس آسکتے ہیں۔ اگر وہ چاہیں تو اپنی ذاتی رہائش گاہ سے بھی انتظامی امور چلا سکتے ہیں۔

تاہم گورنر سندھ نے گورنر ہاؤس آنے کا فیصلہ کیا۔ وہاں پہنچ کر انہوں نے کام کا آغاز کردیا اور کچھ ضروری فائلیں بھی دیکھیں۔

واضح رہے کہ جسٹس ریٹائرڈ سعید الزماں صدیقی کو 9 نومبر کو سندھ کا نیا گورنر مقرر کیا گیا تھا۔ اس سے قبل ڈاکٹر عشرت العباد گورنر کے عہدے پر تعینات تھے جو اس عہدے پر طویل ترین عرصے تک فائز رہنے والے پاکستان کے پہلے اور ایشیا کے دوسرے شخص ہیں۔

Comments

comments

یہ بھی پڑھیں