The news is by your side.

Advertisement

کراچی میں ایڈمنسٹریٹر مشاورت سے آئیگا تو قابل قبول ہوگا، گورنر سندھ

کراچی: گورنر سندھ عمران اسماعیل کا کہنا ہے کہ کراچی میں ایڈمنسٹریٹر مشاورت سے آئے گا تو قابل قبول ہوگا، ایڈمنسٹریٹر اسی شہر سے تعلق رکھنے والا ہونا چاہئے۔

اے آر وائی نیوز کے پروگرام الیونتھ آور میں گفتگو کرتے ہوئے گورنر سندھ عمران اسماعیل کا کہنا تھا کہ کراچی کے مسائل کے سب ذمہ دار ہیں، حل کے لیے مل کر کوشش کرنا ہوگی۔

انہوں نے کہا کہ وفاق اور صوبے کا جو کوآرڈی نیشن ہونا چاہئے تھا وہ نظر نہیں آیا، کراچی کے مسائل سے متعلق کمیٹی تشکیل دے دی گئی ہے، کوشش ہے سیاسی اختلاف بالائے طاق رکھ کر کراچی کو بچایا جائے۔

گورنر سندھ نے کہا کہ کراچی میں بگاڑ گزشتہ 30، 35 سال سے ہے فوری ٹھیک نہیں ہوسکتا، شہر کی صورتحال خوفناک ہے، لوگوں کے گھروں میں پانی داخل ہوگیا ہے۔

عمران اسماعیل نے کہا کہ کوشش ہے کراچی کے مسائل کے حل کے لیے آئیڈیل صورت حال بن جائے، کوشش ہے سیاسی اختلاف اپنی جگہ کراچی کے لیے سب ایک ہوجائیں، وزیراعلیٰ سندھ سے مسلسل رابطہ رہتا ہے۔

ایک سوال کے جواب میں گورنر سندھ نے کہا کہ کراچی کا ایڈمنسٹریٹر ایسا ہونا چاہئے جس پر سب کا اتفاق ہو، کراچی میں یکطرفہ طور پر ایڈمنسٹریٹر لگانے کی کوشش قبول نہیں، کراچی کا ایڈمنسٹریٹر وہ ہونا چاہئے جس کا تعلق کراچی سے ہو۔

Comments

یہ بھی پڑھیں