The news is by your side.

Advertisement

’’وزیراعظم ہفتے کو کراچی آرہے ہیں، شہر سے متعلق پلان شیئر کریں‌ گے‘‘

کراچی: گورنر سندھ عمران اسماعیل کا کہنا ہے کہ وزیراعظم عمران‌ خان ہفتے کو کراچی آرہے ہیں، وہ کراچی سے متعلق پلان کا اعلان کریں‌ گے.

اے آر وائی نیوزکے پروگرام الیونتھ آور میں‌ گفتگو کرتے ہوئے گورنر سندھ عمران اسماعیل نے بتایا کہ کراچی سے متعلق جو پلان ہے اسٹیک ہولڈرز کے ساتھ شیئر کیا ہے، دل بہت کررہا ہے پلان شیئر کروں‌ لیکن وزیراعظم خود ہی اعلان کریں‌ گے.

گورنر سندھ نے کہا کہ اربوں‌ روپے کراچی کے پروجیکٹس پر خرچ کیا جارہا ہے، سندھ کے اداروں‌ کو پیسہ دیں‌ تو گنا جاتا ہے، ورنہ نہیں، وزیراعظم عمران خان کراچی سے متعلق انتہائی سنجیدہ ہے، وزیراعظم کہتے ہیں‌ ڈوبتا اور سسکتا کراچی نہیں‌ چاہئے.

ایک سوال کے جواب میں‌ انہوں‌ نے کہا کہ کراچی کے مسائل کے حل کے لیے انتہائی سنجیدہ ہے، سندھ حکومت کو تو وفاق کو ویلکم کرنا چاہئے جو کراچی میں‌ کام کرائے گا.مجھے لگتا ہے کہ اس مرتبہ سندھ حکومت بھی سنجیدہ ہے لیکن ان کے بیانات دیکھتا ہوں‌تو معاملہ گومگو نظر آتا ہے.

عمران اسماعیل نے کہا کہ ایڈمنستریٹر کراچی سے متعلق مشاورت کی جارہی ہے، کسی جماعت سے ایڈمنسٹریٹر لگایا گیا تو وہ قابل قبول نہیں‌ ہوگا، مناسب ہوگا کہ اسٹیک ہولڈرز کی مشاورت سے دیانتدار ایڈمنسٹریٹر لگایا جائے.

گورنر سندھ نے بتایا کہ تجاوزات سے متعلق شہباز شریف نے کل لوگوں‌کو اکسانے کی کوشش کی، وزیراعظم دو ٹوک کہہ چکے ہیں‌ کسی کو بے گھر نہیں‌ کریں‌ گے، پہلی مرتبہ ڈیفنس میں‌ بارش اس حد تک پانی آیا ہے، نالوں‌ کی صفائی کی گئی تھی ورنہ اس سے زیادہ پانی آتا.

انہوں‌ نے کہا کہ سی بی سی انتظامیہ سےدرخواست ہے مظاہرین کیخلاف ایف آئی آر واپس لیں، مظاہرین سے درخواست ہے سی بی سی انتظامیہ کیساتھ بیٹھ کربات کریں، کےالیکٹرک بجلی اتنی ہی چارج کریگی جتنا حیسکو وغیرہ کرتےہیں.

Comments

یہ بھی پڑھیں