کراچی: گورنر سندھ عمران اسماعیل کا کہنا ہے کہ گرین لائن منصوبے کا آئندہ سال مارچ میں افتتاح ہوگا۔
تفصیلات کے مطابق گورنر سندھ عمران اسماعیل نے ترقیاتی منصوبوں کی افتتاحی تقریب سے خطاب کرتے ہوئے کہا کہ ترقیاتی منصوبوں کی تکمیل میں میئر کراچی وسیم اختر کا ساتھ رہا۔
عمران اسماعیل کا کہنا تھا کہ شہر قائد کے عوام کی سہولت کے لیے مختلف منصوبوں پرعمل پیرا ہیں، منصوبوں کی تکمیل کے لیے سیاسی وابستگی سے بالاتر ہو کر کام کر رہے ہیں۔
گورنر سندھ کا کہنا تھا کہ وزیراعظم نے سندھ کے مختلف منصوبوں کے لیے 12ارب روپےمختص کیے ہیں،گرین لائن منصوبے کا آئندہ سال مارچ میں افتتاح ہوگا۔ انہوں نے مزید کہا کہ سکھر حیدرآباد منصوبے پر وفاقی حکومت 210 ارب روپے خرچ کر رہی ہے۔
کراچی کی ترقی پاکستان کی ترقی ہے، وزیراعظم
اس سے قبل وزیراعظم عمران خان کا کہنا تھا کہ کراچی کی ترقی پاکستان کی ترقی ہے، کراچی پاکستان کی معاشی سرگرمیوں کا مرکز ہے۔
وزیراعظم کا کہنا تھا کہ کراچی پاکستان کا وہ شہر ہے جس کے اوپر جانے سے ملک اوپر جائےگا، کراچی پر برا وقت آتا ہے تو پورے پاکستان پر برا اثر پڑتا ہے، سندھ میں پی ٹی آئی حکومت نہ ہونے کے باوجود بھی ترقی چاہتے ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں