اسلام آباد: حکومت نے سینیٹ میں ووٹوں کی خرید و فروخت ختم کرنےکیلئےقانون سازی کا فیصلہ کرلیا، کل وفاقی کابینہ کے اجلاس میں قانون سازی پر بریفنگ دی جائے گی۔
تفصیلات کے مطابق حکومت نے سینیٹ میں ووٹوں کی خرید و فروخت ختم کرنےکیلئےقانون سازی کا فیصلہ کرلیا ، اس سلسلے میں وزیراعظم عمران خان کل وفاقی کابینہ اجلاس میں مشاورت کریں گے۔
اس حوالے سے مشیر پارلیمانی امور ڈاکٹربابراعوان نے گفتگو کرتے ہوئے کہا کہ کل وفاقی کابینہ کا اہم اجلاس ہوگا، سینیٹ میں ووٹوں کی خرید و فروخت پرقانون سازی پر بریفنگ دی جائے گی۔
بابراعوان کا کہنا تھا کہ صدر مملکت نے ریفرنس کے ذریعے سپریم کورٹ سے رائے مانگی تھی، سپریم کورٹ نے رائے دی ،حکم کیاکہ ووٹ کے اوپر سے پردا اٹھایا جا سکتا ہے، ضرورت پر دیکھا جاسکتا ہے ووٹ جس پارٹی کو پڑنا چاہئے تھا اسی کو پڑا یا نہیں۔
مشیر پارلیمانی امور نے کہا کہ وزارت پارلیمانی امور اور الیکشن کمیشن آپس میں رابطے میں ہے، الیکشن کمیشن سےمشاورت کےساتھ قانون سازی کرنے جا رہے ہیں۔
