اسلام آباد : قومی بچت اسکیموں کی شرح منافع 12.96 فیصد کردیا گیا ، زیادہ منافع کا اطلاق بارہ دسمبر سے ہوگا۔
تفصیلات کے مطابق حکومت نے قومی بچت اسکیموں کے شرح منافع میں اضافہ کر دیا اور اس حوالے سے نوٹی فکیشن جاری کردیا ہے۔
نوٹی فکیشن میں کہا گیا کہ بنچ مارک ڈسکاؤنٹ ریٹ بڑھنے کے بعد پنشن اوربہبودسیونگز سرٹیفکیٹ کے منافع میں اضافہ کیا گیا ہے، دونوں انسٹرومنٹس پر 1.92 فیصد پوائنٹس کا اضافہ ہوا، اضافے کے بعد پنشنرز اور بہبود پر شرح منافع 12.96 فیصد ہوگیا۔
اب ریٹائرڈ، سینئر سٹیزن اور بیوہ خواتین کو قومی بچت اسکیم کے تحت ایک لاکھ روپے پر سالانہ بارہ ہزار نو سو ساٹھ روپے منافع ملے گا۔
نوٹی فکیشن کے مطابق سیونگز اکاؤنٹ پرشرح منافع میں بھی اضافہ کیا گیا ہے ، شرح منافع میں اضافے کا اطلاق 12دسمبر سے ہو گا۔
یاد رہے رواں سال جون میں قومی بچت اسکیموں کےشرح منافع میں تبدیلی کی گئی تھی ، نوٹیفکیشن میں بتایا گیا تھا کہ 10سالہ ڈیفنس سیونگزسرٹیفکیٹ پرشرح منافع 9.35 فیصد اور ریگولرانکم سیونگزسرٹیفکیٹ پرشرح منافع 8.76فیصد مقرر کردی گئی ہے۔
نوٹیفکیشن میں کہا گیا تھا کہ 6 ماہ کےشارٹ ٹرم سیونگزسرٹیفکیٹ پرشرح منافع 7.20فیصدمقرر کیا گیا ہے جبکہ اسپیشل سیونگزسرٹیفکیٹ ، بہبود،پنشنرز اور شہدا فیملی اور سیونگزاکاؤنٹ سرٹیفکیٹ پرشرح منافع برقراررہےگا۔
