اسلام آباد : حکومت نے شہباز شریف منی لانڈرنگ کیس منطقی انجام تک پہنچانے کے عزم کا اظہار کرتے ہوئے کہا احتساب سے پیچھے نہیں ہٹ سکتے۔
تفصیلات کے مطابق وزیراعظم عمران خان کی زیر صدارت پارٹی ترجمانوں کے اجلاس کی اندرونی کہانی سامنے آگیا، ذرائع کا کہنا ہے کہ اجلاس میں شہبازشریف کےمنی لانڈرنگ کیس کی تفصیلات کا جائزہ لیا گیا۔
شہزاد اکبر نے وزیراعظم اور شرکاکو کیس کے قانونی نکات پر بریفنگ دی ، جس کے بعد وزیراعظم نے منی لانڈرنگ کیس کو منطقی انجام تک پہنچانے کے عزم کا اظہار کرتے ہوئے کہا قوم کاپیسہ منی لانڈرنگ میں استعمال ہوا، احتساب سے پیچھے نہیں ہٹ سکتے۔
اجلاس میں ملک میں توانائی کی تازہ صورتحال حال پر بھی غور کیا گیا اور ملک میں گیس کی قلت اور حکومتی اقدامات کا بھی جائزہ لیا گیا۔
وفاقی وزیر توانائی حماد اظہر نے وزیراعظم اور شرکاکو بریف کیا جبکہ مہنگائی کی تازہ ترین صورتحال پر بریفنگ میں بتایا گیا کہ حالیہ اقدامات سے مہنگائی میں کمی کا ٹرینڈ دیکھنے میں آئے گا۔
ذرائع کے مطابق مشیر خزانہ شوکت ترین نے معاشی اعدادوشمار پر اعتماد میں لیا، وزیراعظم کا کہنا تھا کہ عوامی ریلیف اور مہنگائی میں کمی حکومتی ترجیحات ہیں۔
