ریاض: سعودی عرب کے شہزادے ترکی بن محمد بن فہد السعود کو بھاری مالی نقصان کا سامنا کرنا پڑگیا۔
غیرملکی خبررساں ادارے کی رپورٹ کے مطابق یونان کے ساحل پر سعودی شہزادے کا لگژری بحری جہاز ڈوب گیا۔ 230 فٹ لگژری کشتی کی مالیت تقریباً 65 ملین پاؤنڈ ہے۔
رپورٹ میں کہا گیا ہے کہ کشتی جھول کھاتے ہوئے اچانک ایک جانب ڈوب گئی جس کے باعث جہاز شدید متاثرا ہوا ہے۔ ریسکیو عملے نے مرمت کے لیے کشتی کو پانی سے نکال لیا۔
جدید ٹیکنالوجی سے آراستہ مذکورہ لگژری بحری جہاز میں 11 کیبن ہیں جبکہ مسافروں کو ہرممکن سہولیات فراہم کرنے کا بھی بندوبست کیا گیا ہے، 18 مہمانوں کی گنجائش رکھنے والی اس کشتی میں سوئمنگ پول بھی قائم کیا گیا ہے۔
ریسکیو عملے کا کہنا ہے کہ حادثے کی اصل وجہ تاحال سامنے نہیں آسکی۔
