اسلام آباد: وزیر اعظم کے معاون خصوصی برائے اوورسیز سید ذوالفقار بخاری نے پاکستانیوں اور سمندر پار ہم وطنوں کو زبردست خوشخبریاں سنا دیں۔
سوشل میڈیا پر لائیو ویڈیو کے دوران حکومتی پالیسیوں اور اوورسیز پاکستانیوں کی شکایت کا جواب دیتے ہوئے انہوں نے بتایا کہ کویت اور بحرین کے ویزوں کے مسائل حل کر لیے گئے ہیں، دونوں ممالک کے ویزوں میں تمام رکاوٹیں ختم ہوگئی ہیں اور وزیراعظم جلد ہی کویت کا دورہ کریں گے۔
اسکلز ورکرز
انہوں نے کہا کہ جاپا ن، رومینیا اور جرمنی کے ساتھ رابطے ہیں، 300 سے زائد پاکستانی رومینیا جا چکے ہیں اور جرمنی کے سینٹرز پاکستان میں کھل جائیں گے جہاں سے افراد کو تیار کر کے باہر بھیجا جائے گا، قطر میں ڈاکٹرز اور طبی عملہ بھیج رہے ہیں اور ساتھ ہی فیفا ورلڈکپ کے حوالے سے محنت کررہے ہیں، نیشنل ہیلتھ سروس( این ایچ ایس) کے ساتھ ہمارا ایک معاہدہ ہے جس کے تحت 500 میل اور فی میل نرسز ان کے معیار پر اتریں گی۔
ای او بی آئی
معاون خصوصی نے بتایا کہ ای او بی آئی کو ایک ایسا ادارہ بنائیں گے جس میں گھریلو ملازمین ، محنت کشوں ، ریڑھی بانوں اور خصوصاً اوورسیز پاکستانیوں کو پنشن کا حق دیں گے، آئندہ سال اس حوالے سے پوری آگاہی مہم چلائی جائے گی جس کے بعد نئی سروسز کو متعارف کروایا جائے گا۔
برانڈ پاکستان
ان کا کہنا تھا کہ وزیراعظم عمران خان آئندہ چند دنوں میں سیاحت کے حوالے سے برانڈ پاکستان کا افتتاح کریں گے،ایک نام ایک برانڈ دنیا بھر میں جائے گا، یہ سیاحت کے فروغ کے لیے بڑا قدم ہے۔
ڈی ایچ اے
ذولفی بخاری نے وعدہ کرتے ہوئے اوورز پاکستانیوں کو یقین دلایا کہ وہ ڈی ایچ اے کے پرانے سروس چارجز ہی ادا کریں گے،اس مد میں اضافی فیس وصول نہیں کی جائے گی، جو یہاں موجود پاکستانی چارجز دیتے ہیں وہی اوورسیز پاکستانی ادا کریں گے۔
ای ویزہ، ایئرپورٹ سروس
معاون خصوصی کا کہنا تھا کہ ای ویزہ اور ایئرپورٹ سروس کے حوالے سے مفصل رپورٹ تیار کر لی ہے جس میں اوورسیز پاکستانیوں کی شکایات اور درپیش مسائل کو اجاگر کیا گیا ہے، اوورسیز پاکستانیوں کے تجربات اور شکایات پرخصوصی طور پر توجہ دی ہے، یہ رپورٹ جلد وزیراعظم کو پیش کی جائے گی۔
ای ویزہ کی سروس میں مزید بہتری لائی جائے گی، ای ویزہ کو عالمی معیار کا بنایا جائے گا، ایئرپورٹ اور ای ویزہ کے حوالے سے ایک اجلاس ہے جس کے بعد آئندہ چند ہفتوں میں مسائل کم ہو جائیں گے۔
صحت انصاف کارڈ
ذولفی بخاری نے بتایا کہ اوورسیز پاکستانیوں کے لیے صحت انصاف کارڈ منظور ہوچکا ہے اور وزیراعظم نے قواعد و ضوابط پر دستخط کر دیے ہیں تاہم ادائیگیوں کے نظام بنانے جارہے ہیں اور اس حوالے سے منگل کو کابینہ اجلاس سے قبل اہم میٹنگ ہے جس میں اسدعمر، وزارت صحت اور اوورسیز کے حکام ادائیگیوں کا نظام تیار کریں گے۔
کسٹم فری گاڑیاں لانے کی اجازت
ان کا کہنا تھا کہ وزیراعظم نے سخت ہدایات دی ہیں کہ ترسیلات زر کے حوالے سے زیادہ سے زیادہ سہولیات دی جائیں، اس میں سے ایک کسٹم فری گاڑی کا معاملہ بھی ہےجس پر کام جاری ہے، وزیراعظم کی جانب سے اوورسیز کو خصوصی طورپر ملنے والے مراعات پر ایک ہینڈ بک تیار کررہے ہیں جس میں پی آئی اے پرملنے والے الاؤنس، بینکوں کے پوائنٹس سسٹم کارڈ، ہوٹلوں کی رعایت، وی آئی پی ایئرپورٹ لاؤنج سمیت دیگر الاؤنسسز کی تفصیلات درج ہوں گی، آئندہ ہفتے فائنل میٹنگ کرکے آپ کے سامنے تفصیلات پیش کریں گے۔
جاپان میں آئی ٹی کے مواقع
ذوالفقار بخاری نے پیشگی مبارکباد دیتے ہوئے کہا کہ پیر کے روز جاپان کے ساتھ ایک معاہدہ طے پانے والا ہے جس کے تحت آئی ٹی کے شعبے سے وابستہ نوجوانوں کو جاپان میں کام کے مواقع مل سکیں گے، جاپان کو لیبر اور مین پاور درکار ہے اور وہ پاکستانیوں کو مواقع دینے کے لیے تیار ہیں۔
ڈرائیونگ لائسنس
پاکستانی انٹرنیشنل لائسنس باہر ملک ایک سال کے لیے قابل استعمال ہے جب کہ باہر کا لائسنس بھی پاکستان میں استعمال کیا جاسکتا ہے، البتہ کوشش کررہے ہیں کہ جو پاکستانی باہر کام کے لیے جاتے ہیں انہیں پاکستان میں ڈرائیونگ لائسنس کے ٹیسٹ کی سہولت دی جائے تاکہ ان کے لیے آسانی ہے۔
