ایتھنز: یونان کے دارالحکومت ایتھنز کے قریب جنگلات میں لگنے والی آگ نے آبادی کو لپیٹ میں لے لیا جس کے نتیجے میں 74 افراد ہلاک، 150 سے زائد زخمی ہوگئے۔۔
غیر ملکی خبررساں ادارے کے مطابق ایتھنز کے قریب جنگلات میں لگنے والی خطرناک آگ نے آبادی کو لپیٹ میں لے لیا جس کے نتیجے میں 74 افراد ہلاک ہوگئے، آگ ایتھنز کے اردگرد تقریباً 50 کلو میٹر تک پھیل چکی ہے جس سے 100 کے قریب گھر اور متعدد گاڑیاں بھی جل چکی ہیں۔
حکام کا کہنا ہے کہ آگ مقامی وقت کے مطابق شام پانچ بجے لگی اور تیزی سے پھیلتی چلی گئی، گھروں سے بھاگنے والے افراد بھی آگ کی لپیٹ میں آکر جان کی بازی ہار گئے۔
آگ لگنے کی وجہ سے سب سے زیادہ نقصان رفینا شہر میں ہوا جہاں سے 26 لاشیں ملی ہیں، جبکہ 300 فائر فائٹرز، 5 طیارے اور 2 ہیلی کاپٹرز آگ بجھانے میں مصروف ہیں، یونان کی حکومت نے ہمسایہ ممالک سے آگ بجھانے میں مدد کی درخواست کی ہے۔
یونانی فائر بریگیڈ کے ترجمان کے مطابق آگ بہت بڑے رقبے پر پھیلی ہوئی ہے تاہم آگ پر قابو پانے کی کوششیں جاری ہیں، مقامی آبادی کی محفوظ مقامات کی جانب نقل مکانی کا سلسلہ بھی جاری ہے۔
حکام کے مطابق گہرے دھوئیں کے باعث اہم شاہراہیں عام ٹریفک کے لیے بند کردی گئی ہیں جبکہ خشک موسم کے باعث فائر فائٹرز کو آگ بجھانے میں مشکلات کا سامنا ہے، دوسری جانب یونان حکومت نے علاقے میں ایمرجنسی نافذ کردی ہے۔
