The news is by your side.

Advertisement

بزنس مین نے 31 لاکھ کی رقم کچرے میں پھینک دی

مہنگائی کے اس دور میں معمولی رقم سے بھی ہاتھ دھونا خاصے افسوس میں مبتلا کرسکتا ہے، لیکن اگر آپ کو معلوم ہو کہ آپ 31 لاکھ سے زائد کی رقم سے محروم ہوگئے ہیں تو آپ کو کیسا لگے گا؟

ایسی ہی کچھ صورتحال ایک یونانی بزنس مین کے ساتھ پیش آئی جو 31 لاکھ سے زائد کی رقم غلطی سے کچرے میں ڈال آیا۔

مذکورہ بزنس مین ایک بیگ میں کچرا اور ایک بیگ میں 19 ہزار یوروز (31 لاکھ پاکستانی روپے سے زائد) کی رقم لے کر کام کے لیے نکلا، راستے میں ایک کوڑے دان میں بھولے سے اس نے دونوں بیگز پھینک دیے۔

تھوڑی دیر بعد اسے اپنی فاش غلطی کا احساس ہوا، وہ گھبرا کر واپس کوڑے دان کی طرف بھاگا جہاں سے دونوں بیگز غائب تھے۔

بزنس مین نے قریب موجود پولیس اہلکاروں سے مدد لی اور انہیں بتایا کہ وہ اپنی خطیر رقم سے محروم ہوچکا ہے۔ پولیس نے فوری طور پر وہاں سے کچرا اٹھانے والے ٹرک کو لوکیٹ کیا اور اسے روک لیا، ٹرک کچرا لے کر اسے جلانے کے مقام پر لے کر جارہا تھا۔

پولیس اور بزنس مین نے مل کر کچرے کے بیگز چھانے تو پہلے کچرے والا بیگ مل گیا، مزید ایک گھنٹے کی تلاش کے بعد بزنس مین کو اپنی رقم کا تھیلا بھی مل گیا جس کے بعد اس نے سکون کی سانس لی اور پولیس کا شکریہ ادا کر کے گھر لوٹ آیا۔

Comments

یہ بھی پڑھیں