کراچی : سندھ حکومت نے شہر قائد میں گرین لائن بس منصوبہ وفاق کے بجائے اپنے وسائل سے چلانے کا فیصلہ کیا ہے، بلاول بھٹو زرداری نے منصوبے کو جلد مکمل کرنے کی ہدایت کردی۔
تفصیلات کے مطابق کراچی میں چیئرمین پیپلز پارٹی بلاول بھٹو زرداری سے صوبائی وزیر ٹرانسپورٹ اویس قادر شاہ نے ملاقات کی،صوبائی وزیر نے پی پی چیئرمین کو سندھ بھر میں ٹرانسپورٹ نظام کو بہتر بنانے سے متعلق منصوبوں پر بریفنگ دی۔
بریفنگ میں بتایا گیا کہ وفاق کی جانب سے کراچی میں شروع کیے گئے گرین لائن بس منصوبہ کو سندھ حکومت اپنے وسائل سے چلائے گی، وفاق کے تاخیری حربوں سے پروجیکٹ کی تکمیل تاخیر کا شکار ہوئی ہے۔
اویس شاہ کا مزید کہنا تھا کہ یہ پراجیکٹ پیپلزپارٹی کی جانب سے کراچی کے عوام کیلئے بہترین تحفہ ہوگا، اب تک گرین لائن منصوبے پر80فیصد کام مکمل ہوچکا ہے، اس موقع پر بلاول بھٹو کی جانب سے صوبائی وزیر کو گرین بس پروجیکٹ جلد مکمل کرنے کی ہدایت کی گئی۔
گرین لائن منصوبہ رواں مالی سال گرومندر تک مکمل ہوجائے گا‘
واضح رہے کہ سرجانی ٹاؤن سے جامع کلاتھ تک جانے والا گرین لائن منصوبہ رواں مالی سال گرومندر تک مکمل ہوجائے گا، رواں سال ماہ فروری میں گرین لائن بس منصوبے کے نگراں صالح فاروقی کا کہنا تھا کہ تاخیر ہوئی لیکن اب اسے بہتر انداز میں مکمل کیا جارہا ہے۔
ان کا کہنا تھا کہ یہ منصوبہ ابتدائی طور پر صرف گرومندر تک تھا‘ تبدیلیوں کی وجہ سے منصوبے کی تکمیل میں تاخیر ہوئی تاہم اب یہ بہتر انداز میں تکمیل کی جانب گامزن ہے۔
