The news is by your side.

Advertisement

ریاض: لاکھوں کی تعداد میں شجر کاری سے شہر کی آب و ہوا بہتر

ریاض: سعودی عرب کے دارالحکومت ریاض کو گرین ریاض منصوبے کے تحت سرسبز و شاداب کیا جارہا ہے، لاکھوں کی تعداد میں شجر کاری سے شہر کی آب و ہوا میں بہتری آرہی ہے۔

سعودی ویب سائٹ کے مطابق سعودی عرب میں ریاض میونسپلٹی نے گرین ریاض منصوبے کے تحت دارالحکومت میں 16 لاکھ سے زائد پھلواریاں اور پودے لگائے ہیں، یہ کام 5 ماہ کے دوران انجام دیا گیا۔

میونسپلٹی کا کہنا ہے کہ گرین ریاض منصوبے کا مقصد سبزہ زاروں کا رقبہ بڑھانا ہے، اس حوالے سے ایک اور پروگرام شروع کیا گیا تھا۔ اس کی بدولت شہر میں آب و ہوا بہتر ہو رہی ہے اور سبزہ زاروں میں اضافے کی وجہ سے گرمی کی شدت بھی کم ہو رہی ہے۔

ریاض میونسپلٹی کے مطابق 541 مربع کلو میٹر کے رقبے میں 7.5 ملین درخت لگائے جائیں گے جبکہ سعودی عرب کی 16.4 ہزار کلو میٹر طویل شاہراہوں پر بھی شجر کاری ہوگی۔

یہ سارا کام سعودی وژن 2030 کے تحت قومی تبدیلی پروگرام کے ضمن میں انجام دیا جا رہا ہے۔

اس حوالے سے ریاض شہر کے اطراف سبز بیلٹ اور شجر کاری کے حوالے سے ایک ویڈیو کلپ بھی شیئر کیا گیا ہے جبکہ درختوں، پودوں اور پھلواریوں کی آبپاشی کے نیٹ ورک کا حسن بھی اجاگر کیا گیا ہے۔

ریاض میونسپلٹی کی جاری کردہ تفصیلات کے مطابق یکم جنوری سے 31 مئی 2020 تک ریاض شہر میں 16 لاکھ 255 پھلواریاں، 10 ہزار 963 درخت، 9 ہزار 760 پودے اور 26 سو کھجور کے درخت لگائے گئے ہیں۔

Comments

یہ بھی پڑھیں