سویڈن سے تعلق رکھنے والی معروف سماجی کارکن گریٹا تھنبرگ نے ایران کے خلاف امریکی صدر ڈونلڈ ٹرمپ کی حالیہ دھمکیوں کی شدید مذمت کرتے ہوئے عالمی خاموشی پر مایوسی کا اظہار کیا ہے۔
منگل کے روز صدر ٹرمپ نے ایک بیان میں کہا تھا کہ آج رات ایک پوری تہذیب ختم ہو جائے گی اس بیان کے ردعمل میں گریٹا تھنبرگ نے انسٹاگرام پر ایک ویڈیو پیغام جاری کیا جس میں انہوں نے کہا کہ امریکی صدر نے ایک پوری تہذیب کو مٹانے کی بات کی ہے لیکن عالمی سطح پر کوئی ردعمل سامنے نہیں آ رہا، جو کہ انتہائی تشویشناک ہے۔
گریٹا تھنبرگ نے کہا کہ ہم نے نسل کشی، عوام کی مکمل تباہی اور ماحولیات کی بربادی کو معمول بنا لیا ہے اور بدعنوان و نسل پرست جنگی مجرم مکمل استثنیٰ کے ساتھ کارروائیاں کر رہے ہیں۔ انہوں نے عوام پر زور دیا کہ وہ اس قسم کے بیانیے کو روکنے کے لیے اٹھ کھڑے ہوں کیونکہ ابھی بھی دیر نہیں ہوئی۔
اسرائیل ایران جنگ سے متعلق تمام خبریں یہاں پڑھیں
ماہرین کے مطابق امریکا اور اسرائیل کی ایران کے خلاف جنگ کے حوالے سے مختلف نسلوں میں واضح تقسیم دیکھی جا رہی ہے۔ امریکا میں ہونے والے حالیہ سروے رپورٹس سے معلوم ہوا ہے کہ نوجوان نسل جنگی مداخلت اور اسرائیلی اقدامات کے حوالے سے زیادہ شکوک و شبہات رکھتی ہے اور وہ اس قسم کی فوجی کارروائیوں کے خلاف ہے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں