سرائے عالمگیر میں دولہا کی کار نہر میں گرگئی، حادثے میں دولہا اور اس کی سالی ڈوب کر جاں بحق ہوگئے، کار میں دلہن سمیت 5افراد سوار تھے۔
اے آر وائی نیوز سرائے عالمگیر کے نمائندے چوہدری ظفر کی رپورٹ کے مطابق شادی کی خوشیوں سے بھرا گھر ماتم کدے میں تبدیل ہوگیا۔
حادثہ اس وقت پیش آیا جب دولہا دلہن اپنے ولیمے کی تقریب کے بعد اہل خانہ کے ہمراہ گھر واپس جارہے تھے کہ ٹبی ٹاوان کے قریب دولہا کی کار نہر میں گرگئی۔
دولہا اور دلہن سمیت کار میں پانچ افراد سوار تھے، واقعے کی اطلاع ملتے ہی ریکسکیو 1122 اور علاقہ پولیس جائے وقوعہ پر پہنچے ریکسکیو ٹیم نے فوری کارروائی کرتے ہوئے دلہن سمیت تین خواتین کو نہر سے زندہ نکال لیا۔
حادثے میں دولہا اسامہ اور اس کی سالی مریم جاں بحق ہوگئے جن کی لاشیں ضروری قانونی کارروائی کیلئے متعلقہ اسپتال پہنچادی گئیں ہیں, بعد ازاں دولہا کی کار کو بھی نہر سے نکال لیا گیا۔
