کراچی: سول ایوی ایشن اتھارٹی(سی اے اے) نے کابل ایئرپورٹ پر غیر یقینی صورت حال کے پیش نظر ملکی وغیرملکی پروازوں کے لیے ہدایت نامہ جاری کردیا۔
سول ایوی ایشن اتھارٹی کے ہدایت نامہ میں کہا گیا ہے کہ کابل کی طرف سے پاکستانی فضائی حدود میں داخلے سے 15 منٹ پہلے کراچی، لاہور یا اسلام آباد ایریا کنٹرول سینٹر اپنے روٹ کے مطابق فریکوینسی پر رابطہ کریں گے۔
سی اے اے نوٹم کے مطابق کراچی، لاہور یا اسلام آباد سے کابل ائیراسپیس میں اپنے رسک پہ داخل ہونے والے جہازوں کو ائیر ٹریفک سروس ٹرانسفر آف کنٹرول پوائنٹ تک مہیا کی جائے گی۔
نوٹم میں جاری ہدایات 21 اگست سے 30 اگست تک نافذالعمل رہیں گی۔
خیال رہے کہ اسلام آباد ایئرپورٹ پر رش اور جہازوں کی پارکنگ کے مسائل سے نمٹنے کے لیے سی اے اے نے حکمت عملی تیار کرلی ہے، سول ایوی ایشن اتھارٹی نے نوٹم میں پروازوں کے لیے ریڈیوفریکونسی بھی جاری کی۔
پشاور کے باچا خان، کراچی کے قائد اعظم اور لاہور کے علامہ اقبال انٹرنیشنل پر ٹرانزٹ مسافروں کے لیے بندوبست کرنے کے بھی احکامات جاری ہوئے جس میں کہا گیا کہ ٹرانرٹ لاونج میں مسافروں کے بیٹھنے کیلئے انتظامات کیے جائیں۔
محمد صلاح الدین اے آروائی نیوز سے وابستہ سینئر صحافی ہیں اور ایوی ایشن سے متعلقہ امور کی رپورٹنگ میں مہارت رکھتے ہیں