کراچی: گجر نالے پر تجاوزات کے خلاف آپریشن کے دوران ایک گھر منہدم ہونے سے گھر میں موجود مالک مکان اور 6 مزدور زخمی ہوگئے۔
تفصیلات کے مطابق گجر نالے پر تجاوزات کے خلاف گرینڈ آپریشن جاری ہے۔ آج آپریشن کے آغاز میں انتظامیہ ندی کے بالکل کنارے واقع ایک گھر میں داخل ہوئی اور بنیادوں کو توڑنا شروع کردیا جس کے باعث چند ہی لمحوں میں گھر کی چھت اور دیواریں گر گئیں۔ واقعہ میں گھر کے مالک اور اندر موجود 6 مزدوروں سمیت 7 افراد زخمی ہوگئے۔
ریسکیو اداروں کے مطابق زخمیوں کو عباسی شہید اسپتال منتقل کردیا گیا ہے۔
گجر نالہ گرینڈ آپریشن: انتظامیہ کی ناقص منصوبہ بندی کے باعث مکین پریشان *
واضح رہے کہ کراچی کا گجر نالہ نکاسی آب کا ایک اہم ذریعہ ہے تاہم اس پر قائم مکانات اور تجاوزات نکاسی آب میں رکاوٹ بن رہی تھیں جس کے بعد وزیر بلدیات جام خان شورو کے احکامات پر گرینڈ آپریشن کا آغاز کیا گیا۔
آپریشن کے دوران اب تک نالے کے اطراف متعدد مکانات اور باڑوں کو مسمار کیا جا چکا ہے۔ نالے پر 30 ہزار غیر قانونی گھر تعمیر ہیں جن میں سے 10 ہزار سے زائد مکانات آپریشن کی زد میں آنے کا امکان ہے۔ آپریشن شروع کرنے سے قبل انتظامیہ نے رہائشیوں کو اپنے مکانات خالی کرنے کی بھی مہلت دی تھی۔
ڈی سی سینٹرل فرید الدین مصطفیٰ کے مطابق نکاسی آب کی صورتحال کو بہتر بنانے کے لیے نالے کو 60 فٹ چوڑا کیا جائے گا جس میں 6 ماہ لگیں گے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں