لاہور : لنک روڈ زیادتی کیس میں پنجاب پولیس کی سفارش پر مرکزی ملزم عابد علی کا نام بلیک لسٹ میں ڈال دیا گیا جبکہ پولیس نے پہلے ہی ملزم کا شناختی کارڈ بلاک کرادیا تھا۔
تفصیلات کے مطابق لنک روڈ زیادتی کیس کے مرکزی ملزم عابد علی کا نام بلیک لسٹ میں ڈال دیا گیا، ذرائع کا کہنا ہے کہ پنجاب پولیس کی سفارش پر عابد علی کا نام بلیک لسٹ کیاگیا، عابد کا نام بلیک لسٹ میں ڈال کر متعلقہ اداروں کو آگاہ کردیا ہے۔
پولیس کی جانب سے پہلے ہی ملزم کا شناختی کارڈ بلاک کرادیا گیا تھا ، شناختی کارڈ بلاک ہونے سے ملزم بیرون ملک فرار نہیں ہوسکے گا۔
خیال رہے پنجاب کی پولیس گجرپورہ واقعہ کے مرکزی ملزم عابد کواب تک گرفتار نہیں کر سکی، عابد کی گرفتاری کے لیے رات گئے قصور میں سرچ آپریشن کیا گیا تاہم پولیس ایک بار پھر ملزم کو گرفتار کرنے میں ناکام رہی۔
مزید پڑھیں : خاتون زیادتی کیس، پولیس نے فرار ملزم عابد کا شناختی کارڈ بلاک کرا دیا
پولیس نے کارروائی کرتے ہوئے مرکزی ملزم عابد علی کی اہلیہ کو حراست میں لے لیا تھا اور اہلیہ بشریٰ سے تفتیش کی جارہی ہے۔
عابد کے بارے میں انکشاف ہواتھا کہ وہ اجرتی قاتل رہ چکا ہے اور پچیس ہزارروپے لے کر قتل کیا کرتا تھا ،ملزم عابد مختلف جرائم میں چار بار پولیس کے ہاتھوں پکڑا جاچکا ہے۔
دوسری جانب مرکزی ملزم عابد علی کے ایک ساتھی شفقت علی کو پہلے ہی گرفتار کیا جا چکا ہے اور اسے 15 ستمبر کو 14 دن کے جوڈیشل ریمانڈ پر بھیج دیا گیا تھا۔
