گوجرانوالہ: بیرونِ ملک جانے کے خواہش مند نوجوان نے اپنے ہی اغوا کا ڈرامہ رچا کر اہل خانہ سے تاوان کی رقم طلب کرلی، پولیس نے بروقت کارروائی کرتے ہوئے تمام تر حقیقت عیاں کردی۔
تفصیلات کے مطابق پنجاب کے علاقے گوجرانوالہ میں پانچ روز قبل حذیفہ نامی نوجوان اغوا ہوا جس کے بعد اہل خانہ کو ایک نمبر سے کال موصول ہوئی جس میں نوجوان کی رہائی کے عوض تاوان کا مطالبہ کیا تھا۔
پولیس کے مطابق نوجوان کےاغوا کاڈراپ سین اُس وقت ہوا جب اہل خانہ کو موصول ہونے والی کال کی لوکیشن تلاش کی گئی، حیران کن طور پر اغوا کاروں اور مغوی کا مقام ایک ہی نکلا۔
پولیس نے کارروائی کرتے ہوئے حذیفہ کو بازیاب کرا کے فوری گرفتار کرلیا، دوران تفیش نوجوان کا کہنا تھا کہ میں بیرونِ ملک جانے کا خواہش مند تھا مگر رقم نہ ہونے کی وجہ سے یہ ممکن نہیں ہو پارہا تھا۔
اُس نے بتایا کہ اگر اہل خانہ سے رقم وصول کرلیتا تو چند روز بعد اپنے گھر والوں کو ظاہر کرتا کہ مذکورہ رقم کسی سے قرضے کے طور پر حاصل کی اور اس طرح بیرونِ ملک جاکر نوکری حاصل کرلیتا۔ ملزم نے بتایا کہ اہل خانہ سے ٹیلی فون پر اُس نے خود تاوان کی رقم کا مطالبہ آواز تبدیل کر کے کیاتھا جسے کوئی بھی پہنچان نہ سکا۔
