کراچی کے گل پلازہ میں آگ لگنے کی ابتدائی وجہ سامنے آگئی ہے۔
ایس ایس پی سٹی عارف عزیز کا کہنا ہے کہ اب تک کی تحقیقات کے مطابق گل پلازہ میں آگ شارٹ سرکٹ کے باعث لگی ہے۔
انہوں نے کہا کہ اگر پیٹرول کی بوتل ملی ہے تو ممکن ہے کہ کسی نے اپنے استعمال کے لیے رکھی ہو، ابھی ہمارا فوکس تحقیقات پر نہیں ریسکیو اور ریلیف آپریشن پر ہے۔
ایس ایس پی سٹی نے کہا کہ گل پلازہ میں جو میٹریل تھے آرٹیفیشل پلانٹس اور فلاور اس کی وجہ سے آگ تیزی سے بڑھی ہے۔
واضح رہے کہ سانحہ گل پلازہ پر کراچی کی فضا آج بھی سوگوار ہے، عمارت میں سے ملنے والی 27 لاشوں میں 20 کی شناخت ہو گئی ہے جب کہ اب تک 83 لاپتا رپورٹ ہوئے ہیں۔
یہ پڑھیں: گل پلازہ کی تمام خبریں
ریسکیو حکام کا کہنا ہے کہ گل پلازہ کے ملبے سے انسانی اعضا بھی ملے ہیں، ڈپٹی کمشنر ساؤتھ کے مطابق بیس لاشوں کی شناخت کر لی گئی ہے، اور ناقابل شناخت لاشیں ایدھی سرد خانے منتقل کر دی گئیں۔
لاشوں کی شناخت کے لیے ڈی این اے کلیکشن شروع ہو گیا ہے، 18 افراد کے ورثا نے ڈی این اے سیمپل جمع کرا دیے۔ گل پلازہ کے ملبے پر درجنوں شہری اشکبار ہیں، اور اپنے پیاروں کے لیے اب بھی کسی معجزے کے انتظار میں ہیں۔
میئر کراچی مرتضیٰ وہاب نے رات گئے گل پلازہ کا دورہ کیا، اور میڈیا سے گفتگو میں کہا کہ تمام لاپتہ افراد کے ملنے تک ریسکیو آپریشن مکمل نہیں ہوگا، ادارے ریسکیو آپریشن کے لیے موجود ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں