The news is by your side.

کراچی : رہائشی فلیٹ میں سلینڈر دھماکا، دو خواتین جاں بحق، متعدد زخمی

کراچی : شہر قائد علاقے گلستان جوہر میں ایک رہائشی فلیٹ میں سلینڈر دھماکے کا واقعہ پیش آیا ہے، جس کے نتیجے میں دو خواتین جاں بحق اور متعدد افراد زخمی ہوگئے۔

تفصیلات کے مطابق میں گلستان جوہر میں گیس لیکج کے باعث ہونے والا دھماکا ایک رہائشی فلیٹ میں ہوا، جس سے آس پاس کے 3 فلیٹ بھی شدید متاثر ہوئے اور کھڑکیوں کے شیشے بھی ٹوٹ گئے۔

دھماکے کے بعد لگنے والی آگ سے فلیٹ کے مختلف کمرے، کچن مکمل طور پر تباہ ہوگئے، پولیس نے ابتدائی طور پر واقعہ گیس لیکیج کی وجہ قرار دیا ہے۔

حادثے میں زخمی ہونے والے کچھ افراد کو طبی امداد کیلئے نجی اسپتال اور دیگر کو سول اسپتال کے برنس وارڈ منتقل کردیا گیا ہے۔

اسپتال ذرائع کا کہنا ہے کہ واقعے میں زخمی2خواتین سول برنس وارڈ میں دوران علاج دم توڑ گئیں، جاں بحق خواتین میں ماں اور بیٹی شامل ہیں۔

اسپتال انتظامیہ کا مزید کہنا ہے کہ گیس دھماکے میں اب تک مجموعی طور پر13افراد زخمی حالت میں زیر علاج ہیں، جن میں کچھ افراد کی حالت تشویشناک ہے۔

اس حوالے سے بم ڈسپوزل اسکواڈ نے گیس بم دھماکے سے متعلق رپورٹ جاری کردی ہے جس میں کہا گیا ہے کہ رہائشی فلیٹ میں ہونے والا دھماکا گیس پریشر کے باعث ہوا۔

دھماکے کے باعث فلیٹ کی کچھ دیواریں مخدوش ہوکر گرگئیں جبکہ دروازوں اور دیگر سامان کو بھی کافی نقصان پہنچا ہے۔

بی ڈی ایس رپورٹ میں کہا گیا ہے کہ متاثرہ مقام پر گیس کا جمع ہونا دھماکے کا سبب بنا، آگ لگنے سے نقصان زیادہ ہوا اور دو خواتین ہلاک اور متعدد لوگ زخمی ہوئے۔

Comments

یہ بھی پڑھیں