آج پاکستان کے قومی ترانے کے خالق حفیظ جالندھری کا یومِ ولادت منایا جارہا ہے۔ وہ 14 جنوری کو متحدہ ہندوستان کے مشہور شہر جالندھر میں پیدا ہوئے تھے۔ تقسیم کے بعد کئی شعرا میں سے حفیظ جالندھری کے لکھے ہوئے ترانے کو قومی ترانہ منتخب کیا گیا
حفیظ جالندھری نظم اور غزل دونوں کے قادرالکلام شاعر تھے۔ تاہم ان کا سب سے بڑا کارنامہ شاہنامہ اسلام ہے جو چار جلدوں میں شایع ہوا۔ اس کے ذریعے انھوں نے اسلامی روایات اور قومی شکوہ کا احیا کیا جس پر انھیں فردوسیِ اسلام کا خطاب دیا گیا۔
حفیظ جالندھری نے یہ قومی ترانہ احمد جی چاگلہ کی دھن پر تخلیق کیا تھا اور 1954ء میں اسے قومی ترانے کے طور پر منظور کیا گیا تھا۔
حفیظ جالندھری کے شعری مجموعوں میں نغمہ بار، تلخابہ شیریں اور سوز و ساز، افسانوں کا مجموعہ ہفت پیکر، گیتوں کے مجموعے ہندوستان ہمارا، پھول مالی اور بچوں کی نظمیں قابلِ ذکر ہیں۔
حفیظ جالندھری نے 21 دسمبر1982ء کو لاہور میں وفات پائی۔ وہ مینار پاکستان کے احاطے میں آسودہ خاک ہیں۔
