لوئر دیر (17 مئی 2026): امیر جماعت اسلامی پاکستان حافظ نعیم الرحمان نے پیٹرولیم لیوی کے خلاف عدالت سے رجوع کرنے کا اعلان کر دیا۔
جلسے سے خطاب کرتے ہوئے حافظ نعیم الرحمان نے کہا کہ جماعت اسلامی پیٹرولیم لیوی کے خلاف کل اسلام آباد کی عدالت میں پٹیشن دائر کرے گی، پیٹرول مہنگا کرنا بدترین ظلم ہے، مہنگائی کے خلاف عیدالضحیٰ کے بعد اسلام آباد کی طرف فیصلہ کن مارچ کریں گے۔
یہ بھی پڑھیں: ’سبسڈی کی بھیک نہیں چاہیے، پیٹرول پر لیوی ختم کی جائے‘
حافظ نعیم الرحمان نے کہا کہ یہ نظام عوام کو بہت تنگ کر رہا ہے بڑی جدوجہد کی تیاری کریں، اب نظام کی شاخیں نہیں کاٹیں گے بلکہ جڑ سے اکھاڑ دیں گے، 79 سال حکومت کرنے والوں میں ٹاپ بیوروکریٹس اور وڈیرے ہیں، جاگیرداروں، سرمایہ کاروں اور مافیاز کا ایک کنسورشیم ہے۔
امیر جماعت اسلامی پاکستان نے مزید کہا کہ ہم نے مل کر ان کمپنیوں کو گرانا ہے نظام تبدیل کرنا ہے، پی ٹی آئی، ن لیگ، جے یو آئی اور سب کو کہتا ہوں تعلیم میں ہمارا مقابلہ کرو، ہم نے ہزاروں ادارے قائم کیے ہیں تم بھی کر کے دکھاؤ، حکومت یہاں ایک بھی کالج نہیں کھول سکی۔
جلسے سے خطاب میں انہوں نے یہ بھی مطالبہ کیا کہ پاکستان کے تمام سیاسی قیدیوں کو آزاد ہونا چاہیے۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں