The news is by your side.

Advertisement

اقتصادی رابطہ کمیٹی کی ملک میں تیل کی تلاش اورکاروباری سہولتوں کو بہتر بنانے کی منظوری

اسلام آباد : کابینہ کی اقتصادی رابطہ کمیٹی نے ملک میں تیل کی تلاش اور پیداواربڑھانے کے شعبے میں سرمایہ کاری کے فروغ اورکاروباری سہولتوں کو بہتر بنانے کی منظوری دے دی۔

تفصیلات کے مطابق وزیر اعظم کے مشیر خزانہ و محصولات ڈاکٹر عبد الحفیظ شیخ کی زیر صدارت کابینہ کی اقتصادی رابطہ کمیٹی کا اجلاس ہوا، اجلاس میں وزرات توانائی(پٹرولیم ڈویژن) کی تجویز پر ملک میں تیل کی تلاش اور پیداواربڑھانے کے شعبے میں سرمایہ کاری کے فروغ اورکاروباری سہولتوں کو بہتر بنانے کی منظوری دے دی گئی۔

اجلاس میں توسیع ، تجدید ، منسوخی اور دیگر ضمنی امور سے متعلق اٹھارہ ملکی قوانین اور ان سے جڑے لگ بھگ پچیس قانونی مراحل کو آسان اور سادہ بنانے کے لیے انرجی ٹاسک فورس اور سٹیک ہولڈرز کی مشاورت سے تجویز کردہ ترمیمات اور ان ترمیمات کو متعلقہ قوانین میں ضم کرنے کی منظوری بھی دے دی۔

اقتصادی رابطہ کمیٹی ای سی سی نے ایف بی آر کی تجویز پر ’ایف بی آر ریفنڈ سیٹلمنٹ کمپنی لمیٹڈ‘ کے تحت جاری کردہ 30 ارب روپے کے بانڈز کے عوض اتنی ہی رقم کی ٹیکنکل سپلیمنٹری گرانٹ کی ادائیگی اور چیکوں کی صورت میں سیلز ٹیکس ریفنڈز ادا کرنے کی منظوری دی۔

ای سی سی نے کامرس ڈویژن کی تجویز پر زیرو ریٹڈ ایکسپورٹ سیکٹر کو’ایکسپورٹ اوری اینٹڈ سیکٹرز جس میں کپڑا، قالین بانی، چمڑا، کھیلوں کا سامان اور آلات جراحی شامل ہیں‘، کا نام دینے کی منظوری دے دی۔

ای سی سی نے وزارت توانائی(پاور ڈویژن) کی تجویز پر تھل نووا پاور تھر لمیٹڈ اور تھر انرجی لمیٹڈ منصوبوں کے نفاذ کے لیے کیے گئے باہمی معاہدہ جات میں حکومت کی جانب سے ان دونوں منصوبوں کو 400 دنوں کے اندر ختم کرنے کے استحقاق کی مدت کو بڑھا کر490 دن کرنے کے ای سی سی کے فیصلہ کی تکمیل کے لیے متعلقہ معاہدہ جات میں مجوزہ شق شامل کرنے کی منظوری دے دی۔

fb-share-icon0
Tweet 20

Comments

comments

یہ بھی پڑھیں