The news is by your side.

Advertisement

شادی نہ کرنے کی قسم توڑنے پر لڑکی کا سہیلی کے خلاف جان لیوا قدم

حافظ آباد: پنجاب کے ضلع حافظ آباد میں ایک لڑکی نے اپنی سہیلی پر کرائے کے قاتلوں سے حملہ کرا دیا جس سے وہ شدید زخمی ہو گئی، اس سلسلے میں ایک آڈیو بھی منظر عام پر آ گئی ہے۔

تفصیلات کے مطابق حافظ آباد کے نواحی قصبے جلال پور بھٹیاں میں ساتھ جینے مرنے کی قسمیں کھانے والی سہیلی جان کی دشمن بن گئی، ملزمہ نے سہیلی کو مارنے کے لیے کرائے کے قاتلوں کو اس کے گھر بھیج دیا، ملزمہ کی قاتلوں کے ساتھ گفتگو کی آڈیو بھی سامنے آ گئی۔

رپورٹ کے مطابق دونوں لڑکیوں نے کبھی شادی نہ کرنے کی قسمیں کھائی تھیں، لیکن ایک لڑکی کی منگنی والدین نے طے کر دی تو دوسری لڑکی نے غصے سے انتہائی قدم اٹھا لیا، اور گھر سے زیور چرا کر ٹارگٹ کلر کو دے کر دوست پر حملہ کروا دیا۔

لڑکی کو سہیلی پر اس بات کا غصہ تھا کہ زندگی بھر شادی نہ کرنے کی قسم کیوں توڑی، قاتلانہ حملے میں لڑکی شدید زخمی ہو گئی ہے، جو اس وقت اسپتال میں زندگی اور موت کی کشمکش میں مبتلا ہے۔

یہ واقعہ گزشتہ دنوں جلال پور میں پیش آیا تھا، پولیس نے ایک ملزم کو گرفتار کر لیا ہے جب کہ لڑکی فرار ہے، پولیس کے مطابق فائرنگ سے لڑکی شدید زخمی ہوئی، ملزمان موٹر سائیکل پر سوار ہو کر آئے تھے اور موٹر سائیکل چھوڑ کر فرار ہوئے۔

ملزمہ نے اپنی دوست کو مارنے کے لیے ٹارگٹ کلرز کو گھر سے جیولری چرا کر دی، ملزمہ اور ٹارگٹ کلر کے درمیان ہوئی گفتگو بھی منظر عام پر آ گئی ہے، جس میں ملزمہ ٹارگٹ کلرز کو ہدایات اور حملے کا وقت بتا رہی ہے۔

پولیس کا کہنا ہے کہ ٹارگٹ کلرز نے رات گئے لڑکی کے گھر میں گھس کر اس پر فائرنگ کی۔

Comments

یہ بھی پڑھیں